હરિનો સાથ

હું તો સ્મરી રહ્યો એકધારો, હરિ છૂટે ના સાથ કદી તારો.

મારે હરપળે તારાથી પનારો, હરિ છૂટે ના સાથ કદી તારો.

તારે ભરોસે જીવનનાવ હંકારું છોને ના દેખાતો કિનારો,

અચળ આસ્થા હો ઉપચારો, હરિ છૂટે ના સાથ કદી તારો.

પ્રાણવાયુમાં પરમેશની પ્રાપ્તિ, સૂક્ષ્મ સ્વરુપે હો નજારો,

આવો હરિ ઉરથી આવકારો, હરિ છૂટે ના સાથ કદી તારો.

રંગલાખવત્ હરિ મિલન આપણું કોઈ કાળે ન હોય જુદારો,

પ્રાર્થના ગણી લેજે છોને લવારો,હરિ છૂટે ના સાથ કદી તારો.

અંશ અંશીને મળવા જતા આવો હોય સદા દુન્વયી ધારો,

કેમ વિલંબ, શું વાંકગુનો છે મારો? હરિ છૂટે ના સાથ કદી તારો.