ગુંજતું ગૌરવ સતત

એક, બે કે કૈંક દિવસોથી કશું વળશે નહીં;

ભવ અહિં ઓછો પડે, પિછાણવા ગુજરાતને.

સરહદોની પાર કાયમ, ગુંજતું ગૌરવ સતત;

સાથમાં દ્રારામતિ ઉદ્ધારવા ગુજરાતને.

બે કદમ ચાલો અને અભરે ભર્યો સાગર મળે;

મોતીઓ સાચા અહિં નીપજાવવા ગુજરાતને.

ધ્યાનમાં જોગી બની બેઠાં ગિરીશૃંગો બધાં;

કોઈ અનહદ નાદને સંભળાવવા ગુજરાતને.

ગોમતી, તાપી વળી રેવા ને અંબિકા અહિં;

રણઝણે ઝાંઝર સમી શણગારવા ગુજરાતને.

ઊડતી વેકૂર ઝીણી રજ બની જયાં રણ મહીં;

તપ અહિં તોરલ તણું ઉગારવા ગુજરાતને.

સત્યની સોટી, અહિંસા ટેક લઈને આકરી;

યુગપુરુષ અહિં લોહ-સો અજવળવા ગુજરાતને.

ચોરવાડી ઝુંડમાં લેતો પ્રતિજ્ઞા શખ્સ કો'

વિશ્વનાં નકશા મહીં દેખાડવા ગુજરાતને.

ગળથૂથીમાં જે મળ્યો એ રંગ દેખ્યોને તરત;

કંઈક યાયાવર પહોંચ્યા જાણવા ગુજરાતને.

છે સખાવત ને સદાવ્રતની બધી ભૂમિ અકળ,

થઈ પરોણો ને પધારો માણવા ગુજરાતને...