ચાલો છંદ શીખીએ

આંખોથી ટપક્યું દર્દ તો, હૈયે ઘણી હળવાશ છે,

ઘૂસી ગયેલી ફાંસને, કાઢ્યા પછીની હાશ છે.

ભાડાનું સમજી દિલને તેં, ખાલી કર્યું, સારું કર્યું,

મારા જ ઘરમાં જો મને, લાગે હવે અવકાશ છે.

જીવાશે નહીં તારા વગર, એ માન્યતા મારી હતી,

આરામથી આજે ય પણ, ચાલી રહ્યાં આ શ્વાસ છે.

બહેલાવવા દિલ લઇ ગયો, ને મન ભરાતા દઇ ગયો,

ભગવાનનો ઉપકાર કે, દિલ મારું મારી પાસ છે.

બે મોહરા તારાં હતાં, એ જાણ જલ્દી થઇ મને,

ભૂલી સવારે હું પડી, રાતે જુઓ અજવાસ છે.

મારી વફા, લાગી જફા, સમજી શક્યો ના તું મને,

આ પ્રેમનાં નામે હવે, મારે તો બસ ઉપવાસ છે.

જાહોજલાલી મારી તું, જોઈ શકે તો જોઈ લે,

ધરતી મળી નીચે અને, ખુલ્લું ઉપર આકાશ છે.