અમારી આ જીંદગી ચાલી રહી છે

અધૂરપ ઓછપ ઉણપોની વચ્ચે

શ્વાસોની ગતિને થંભાવી થોડી

ચહેકતી મ્હેક્તી થરકતી મઝાની

અમારી આ જીંદગી ચાલી રહી છે

સમયના તમાચા ગાલે પડ્યા છે

ભૂલોની લાલપ ઉપસી છે સારી

રણકતી ટહુકતી ખનકતી મઝાની

અમારી આ જીંદગી ચાલી રહી છે

સંબંધોની સરકારો વહેવારો વટના

સાચવવી પડે છે આવી બેહાલી

કંકુના કજીયા કંકાસ સાથે

અમારી આ જીંદગી ચાલી રહી છે

શબ્દો પણ આજે મહેનતાણું માંગે

લખતા લાગણી ખર્ચી નાખું મારી

આલમની અવળચંડાઈ અર્ચિત કરીને

અમારી આ જીંદગી ચાલી રહી છે.