తెలంగాణా వైభవం

సీసమాలిక.

1.

రాణి రుద్రమదేవి రాజసంబుగ నిల్చి 

ప్రతిభతో చేసెతా బాలనంబు 

వీరసింగమువోలె విజయంబు సేయగా 

పరరాజులెల్లరు వణికి రపుడు 

చెఱువులన్ ద్రవ్వించి కరువుకాటకములన్ 

దీర్పంగ నీ సీమ దివిని మించె 

పూర్వమా ప్రభువులు పుడమిని తామేలి 

ప్రజల శ్రేయముఁ గోరి వరలిరచట!/

2.

దుష్టరజాకార్లు దోపిడీదారులై 

విలయంబు సృష్టించ వెఱపులేక 

కత్తులను ఝళిపించి కలముతో చెండాడి 

ప్రజలను రక్షింప పరుగుపెట్టి 

ప్రాణంబు లొడ్డుచు పల్లెపల్లెతిరిగి 

పోరాటముల్ చేయ వీరవరులు 

నా త్యాగ ఫలముల నానంద మొందుచు 

పౌరులెల్లరు నేడు పంచుకొనిరి./

తేటగీతిమాలిక.

కాకతీయుల సంస్కృతిన్ గవులు పొగడి 

తరతరంబుల విజయంపు చరిత తెల్ప 

నాటి సుందర శిల్పాలు నేటి వరకు 

నిలిచి యున్నవి ఠీవిగా వెలుగు తోడ /

భవ్యమైనతెలంగాణ పసిడి సీమ 

పైరుపంటలతో నేడు పరిఢవిల్లి 

భావితరముకు స్ఫూర్తిగా పయనమగుచు 

శాశ్వతంబుగ నిల్చిన శాంతి కలుగు.//