పుట్టినాము

చిరునవ్వుల హరివిల్లులు..కురిసేందుకు పుట్టినాము..! 

సహజీవన సౌందర్యము..పెంచేందుకు పుట్టినాము..! 

పచ్చదనం కాపాడే..పని మనదని చెప్పాలా.. 

ఈ పుడమిని స్వర్గముగా..నిలిపేందుకు పుట్టినాము..! 

పశువులైన పక్షులైన..మనకు తోటి నేస్తాలే.. 

మనం దైవ ప్రతి'నిధు'లని..చాటేందుకు పుట్టినాము..! 

అందమైన అమాయకత..మన సొంతం ఎప్పటికీ.. 

మెఱుపుమల్లె తీగలలా..ఆడేందుకు పుట్టినాము..! 

అనంతమౌ జ్ఞానానికి..ఆలయమే ప్రతిహృదయం.. 

ప్రతి'భా'వన మధుసీమలు..ఏలేందుకు పుట్టినాము..!