నా హృదయం

నీ కోసం వేచియున్న..రాధికలా నాహృదయం..! 

నీపూజకు నవమల్లెల..మాలికలా నాహృదయం..! 

తడబడు నా మాటలతో..తూచలేను నీ మహిమను.. 

నినుపొగడగ పొంగుతున్న..గీతికలా నాహృదయం..!

ఏ పున్నమి వెన్నెలైన..సాటి ఎలా నీ నవ్వుకు.. 

నిను చూస్తూ ఉండిపోవు..చంద్రికలా నాహృదయం..! 

సృష్టిలోని కణకణమూ..నీ సుందర ఆలయమే.. 

నీవు చేరి నాట్యమాడ..వేదికలా నాహృదయం..! 

నా కలలను పండించే..నీ కలయే ఈ జగమే.. 

నీ చూపుల వానసాక్షి..మౌనికలా నాహృదయం..! 

ఎదురుచూపు మాధుర్యం..తెల్పు మాటలేవంటా.. 

నిజవసంత వేళలలో..సారికలా నాహృదయం..!