అమ్మ

ఉదయించే భానుకిరణాలంత వెచ్చనిది నీ ప్రేమ 

పున్నమిరేయి వెన్నెలంత చల్లనిది నీ చూపు 

పచ్చిపాల నురగంత స్వచ్ఛమైనది నీ మనసు 

మకరందాల మధువంత మధురమైనది నీ మాట 

కటిక దరిద్రమందు కూడా నీ వారికోసం పడే తపన 

కరుడుకట్టిన ఉన్మాదిని సైతం క్షమించే నీ జాలి 

కష్టాల పద్మవ్యూహ్యాన్ని సైతం ఎదిరించే నీ తెగువ 

ఎన్ని అద్భుతాలు దాచుకున్నావో కదా..!!!

ఎర్రని సూరీడు సైతం తలవంచడా నీ కరుణ ముందు 

జాబిలమ్మ సైతం ఈర్ష్య పడదా నీ అమ్మతనం ముందు 

భూమాత సైతం చిన్నబోదా నీ సహనం ముందు 

ఎంతని చెప్పను ఏమని చెప్పను 

పంచభూతాలు సైతం తన్మయంతో నాట్యమాడవా నీ పేరు వినగా... 

ఇక ఏమని వర్ణించను నీ గొప్పతనాన్ని....

-- వెంకటరమణ రాగోలు