ఆత్మీయులు

ఆపదలో బలగమంత ఆదుకుంటె బలమేలే

నేస్తమొకడు కష్టాలను పంచుకుంటె బలమేలే

 చిరుదివ్వెను వెలిగించిన చీకట్లే తొలగి పోవు

అభాగ్యులకు చిరుసాయపు

అండవుంటె బలమేలే

పంతాలూ పట్టింపులు

అహంకార మసూయలూ

బంధాలలో ఈర్ష్యలనూ వదులుకుంటె బలమేలే

చిరునవ్వుల చిలకరింపు ఆత్మీయత పలకరింపు

మమతపంచు స్నేహాలను కలుపుకుంటె బలమేలే

ఒంటరి బతుకు గమనంలో మాటలన్ని మహితమౌను

సహకరించ దైవమునే నమ్ముకుంటె బలమేలే

మధురమైన భాషణము మర్యాదలు భూషణముగ

అరమరికలు లేకుండా కలిసివుంటె బలమేలే 

మనుషులంత ఒక్కటిగా మానవీయ విలువలతో

సమరసతా భావముతో నడుచుకుంటె బలమేలే