ગર્ભિત રહસ્ય

ત્રીસ વર્ષનાં દાંપત્ય જીવન જીવ્યા બાદ એવું તો શું બની ગયું કે રીમાએ મયૂર સાથે ડિવોર્સ લેવાનો નિર્ણય લઈ લીધો. તેણીને ઘણાંએ સમજાવી પણ તેણીનો નિર્ણય ક્રેઝી ગ્લુ જેવો હતો.

ઓછું બોલનાર મયુરને ઘણાં મિત્રોએ પુછ્યું.. ‘મયૂર, તું તો કહે સાચી હકીકત શું છે? ત્રીસ, ત્રીસ વર્ષ સુધી સાથે રહ્યાં, એક સાચાં પતિ-પત્નિની જીવી સુંદર જિંદગી જીવી રહ્યા હતાં અને એકાએક રીમાએ તને ડિવૉર્સ આપવાનું નક્કી કરી નાંખ્યું. મયુરે પણ તેનો કોઈ પ્રત્યુત્તર આપ્યો નહીં.

શિયાળાનો સુંદર ઋતુ હોય અને અચાનક માવઠું પડી જાય એજ રીતે રીમા અને મયુરનાં જીવનમાં આ અચાનક માવઠું ક્યાંથી આવી ગયું. અમેરિકા જેવાં દેશમાં પણ આપણાં સમાજમાં “અફવા” જેવો અસાધ્ય રોગ એક કેન્સરની જેમ છુપાયેલો છે તે બહાર આવી રહ્યો છે. કોઈ કહેઃ તે લોકોએ બહું પ્રયત્ન કર્યા, કેટ કેટલી દવાઓ કરી, ડોકટર્સની સલાહો લીધી રીમાને બાળક થતું નથી, મયુરને બાળકો બહું જ ગમે છે અને તેને લીધે રીમાએ બીજા લગ્ન કરવાં છુટ આપી હોય પણ એ અમેરિકામાં ત્યારેજ શક્ય બને કે રીમા ડિવૉર્સ આપે. તો કોઈ કહે..મને તો એવું લાગે છે કે રીમાને પોતાની ઓફીસનાં બૉસ સાથે કંઈક લફરું છે..અરે ભાઈ..સ્ત્રીને માપવી એટલે બ્રહ્માંડને માપવું! આવી ઘણી ઘણી અફવા ડલાસ(ટેક્ષાસ)માં ચાલવાં લાગી. રીમાની બેનપણી સીમા તેણીને આ ચાલતી અફવાની વાત કરે પણ રીમાને તેની કશી અસર થતી નહોતી.

મયુર અને રીમા બન્ને એવાં હતાં કે એમની પાસેથી વાત કઢાવવી એટલે સાગરને ઉથલાવવાં જેવી વાત છે.

મયુર અને રીમાનાં પચ્ચીસમી એનીવર્સરી વખતે મિત્રો એ સરપ્રાઈઝ પાર્ટી આપી તેમને એક હર્ષભરી નવાઈ સાથે આનંદ વિભોર કરી દીધાં હતાં મિત્રોમાં બન્ને પતિ પત્નિ સૌનાં પ્રિય હતાં. કોઈને પણ કામ પડે બન્ને અડધી રાતે મદદે પહોંચી જાય, આર્થિક પરિસ્થિતીમાં મદદરૂપ થાય અને બહુજ સોશિયલ અને ફ્રેન્ડલી હતાં. કોઈ પણ વ્યક્તિને એકવાર મળે તો તેને પોતનાં માની લે તેવાં મળતાવડાં સ્વભાવનાં એવાં કપલને કોની નજર લાગી ગઈ એ ચર્ચા થવાં લાગી..અનુમાન કરી શકે પણ બન્ને વચ્ચેની આ ગરમા ગરમ ગર્ભિત વાતની કોઈને પણ ખબર ના પડી.

કોર્ટમાં ડિવૉર્સ પર સહી-સિક્કા થયાં..મયુરનાં આંખમાં આંસુ હતાં..રીમાની આંખમાં પણ આંસું સરક, સરક થઈ રહ્યાં હતાં પણ રીમા એટલી મજબુત હતી કે આંસુને પડવાની તક ના આપી. મયુરે કેટ કેટલી વિનંતી, આજીજી, સમજાવટથી રીમા સાથે ડિવૉર્સ વિશે અવારનવાર વાત કરી કે ‘રીમા, ત્રીસ વર્ષબાદ ડિવૉર્સ! મારી કોઈ ભુલ થઈ ગઈ હોય તો મને કહે, હું તારી માફી માંગું..પણ રીમાએ તેનો કોઈ પ્રત્યુત્તર ના આપ્યો. રીમાએ ના કોઈ મિલકત કે ના કોઈ એલિમની માત્ર ડિવૉર્સનાં પેપર્સ સિવાય કશું ના માંગ્યું…

કોર્ટમાંથી જતાં જતાં રીમાએ મયુરને એક ચીઠ્ઠી આપી. મયુરે સત્વરે ચિઠ્ઠી ખોલી વાંચવાં લાગ્યો..

પ્રિય મયુર,

મને માફ કરજે. તારાં જેવો પતિ બસ મને જન્મ જન્મ મળે એવી ઈશ્વર પાસે પ્રાર્થના કરું છું.

તને ખ્યાલ છે મયુર આપણે બન્ને એ છ મહિનાં પહેલાં એન્યુઅલ મેડિકલ કરાવેલ? ત્યારે મને જે શંકા હતી તે પરથી ડોકટરને ખાનગીમાં મેં તારાં અને મારાં માટે એચ.આઈ.વીનો ટેસ્ટ કરાવેલ અને મેં તને કશું કીધેલ નહીં તે બદલ માફી ચાહું છું. તારું રિઝલ્ટ નેગેટીવ અને મારો ટેસ્ટ પૉઝીટીવ આવેલ. મને ડોકટરે માત્ર એકાદ વર્ષ આપેલ છે. મેં ત્યારથી તારી સાથે એક પત્નિ તરીકે જે વ્યવહાર કરવો જોઈએ તે બંધ કરી દીધો તું ઘણી વાર રાત્રે અપસેટ થઈ જતો છતાં હું બીજા રૂમમાં સુવા જતી રહેતી. મેં તારાથી દૂર રહેવાં કોશિષ કરી પણ દિવસે દિવસે અશ્કય અને મુશ્કેલ બન્યું. છુટા છેડા સિવાઈ કોઈ છુટકો જ નહોંતો..આ કેવી રીતે થયું તેનો ખુલાસો કરવો મુશ્કેલ નહીં અશ્ક્ય છે કારણ કે તેમાંથી હજારો સવાલ પેદા થાય તેમ છે. એટલું જરૂર કહીશ કે મેં તને કોઈ અંધારામાં રાખી પાપ નથી કર્યું..હું બળતી લાશ છું, ભસ્મીભુત ક્યારે થઈ જાઉં તેની મને ખબર નથી પણ તેનો તણખો તને ના અડી જાય એને લીધેજ આ નિર્ણય આખરી બન્યો છે. છેલ્લા શ્વાસ લગી તારીજ સુહાગણ રહીશ..

-રીમા

મયુર ચીઠ્ઠી વાંચી પુરી કરે તે પહેલાંજ રીમાની કાર દૂર દૂર નીકળી ગઈ હતી. આજ દસ વર્ષ વિતી ગયાં એક ગર્ભિત રહસ્ય માત્ર રહસ્યજ રહ્યું..મયુરની બાકીની જિંદગી…”એ ક્યાં છે?” આમ કેમ થયું? એજ મથામણનનાં અર્ધ પાગલપણમાં જવાં લાગી.