ଜ୍ବଳନ୍ତ ଜୀବନ
ଜ୍ବଳନ୍ତ ଜୀବନ
ବିଶ୍ବ ଏକ ରଙ୍ଗମଞ୍ଚ ଜୀବନ ଏକ ନାଟକ
ଆମେ ସବୁ କଳାକାର
ମୃତ୍ୟୁ ତ ବିକରାଳ ଯବନିକା
ଯାହା ଅବଶ୍ୟ ହେବ ଆହୁତି ବା ଆତ୍ମଦାହେ ।
ଭୂମିକା ସାନବଡ
କାହାକୁ କେତେ ଆଉ
କେବେ କି ଚରିତ୍ର କି ରଙ୍ଗ ବୋଳା ହେବ
କେଉଁ ଯାଏ କେଉଁ ରସେ ଅଭିନୟ
ହାସ୍ୟ ଶୋକ ଘୃଣା ବିଭତ୍ସ ସବୁ ପୂର୍ବ ନିର୍ଦ୍ଧାରିତ ।
ଏକକ ଅଭିନୟ କି ମୁକ ଅଭିନୟ କି ଦ୍ୱୈତ
ସବୁ କିଛି ସୀମିତ ଯୋଗ୍ୟତା ଅନୁସାରେ
ବାଃ ବାଃ ନେବାକୁ
ନିଖୁଣ ଅଭିନୟ କରି ସାର୍ଥକ କରି ହେବ
ନିଜସ୍ଵ ନିପୁଣତାରେ ।
ଭୂମିକା ସରିଗଲେ ଗ୍ରୀନ୍ ରୁମ୍ ଯାଇ
ରଙ୍ଗ ଛଡାଇବାକୁ ହବ
ମୂଳରୁପକୁ ଫେରିବାକୁ
ଚୁପଚାପ୍ ଭିନ୍ନ ଏକ ନାଟକ ଯାଏଁ ।
ଜୀବନ , ଅଥବା ଏକ ବସାଘର
କିଛି ସମୟ ପାଇଁ
ନିୟମ ମାନି ଚଳିବାକୁ ହେବ ଏଠି
ଘର ମାଲିକ ଇଚ୍ଛାରେ
କ୍ଷୟ କ୍ଷତିର ଭରଣା କରିବାକୁ ହେବ
ଅକସ୍ମାତ ମିଆଦ ପୁରିଗଲେ ।
ଦଣ୍ଡେ ନିମିଷେ ପାଇଁ ଅଧିକ ରହିପାରିବନି
ଆଉ କାହାକୁ ଏଠି ଛାଡି ଚାଲିବାକୁ ହେବ
ପ୍ରୀତି କଳହ ପ୍ରତାରଣା
ଯେତେ ଝଡଝଞ୍ଜା ଆସିଯାଉ ପଛେ
ସମସ୍ତଙ୍କୁ ସ୍ବାଗତ କରି ରହିବାକୁ ପଡିବ
ଦଗ୍ଧିଭୂତ କାୟା ନେଇ ଯିବା ବେଳ ଯାଏଁ ।
ଆଉ ଯଦି ବନ୍ଦୀଘର,
ଦଣ୍ଡ ସରିବା ଆଗରୁ
ଖସିଯିବାକୁ ଚେଷ୍ଟା କଲେ
ଦଣ୍ଡ ବିଧାନ ବଢିଯିବ ହୁତାଶନେ ଜଳିବାର
ନିୟାମକଙ୍କ କଠୋର ନିର୍ଦ୍ଦେଶରେ ।