କରିଅଛି ବାରଓଷା
କରିଅଛି ବାରଓଷା
ମନେପଡ଼େ ଆଜି ସେଇଦିନ କଥା
ତୋଅରି କଅଁଳ ଛୁଆଁ ,
ଯେଉଁଦିନ ମୋର ଜଠରୁ ଜନମି
ଡାକଦେଲୁ ତୁହି କୁଆଁ ।
ସ୍ନେହ-ମମତାରେ ପୁଲକିତ ହେଲା
ମୋର ଏଇ ତନୁ-ମନ ,
ତୋ ମୁହଁକୁ ଚାହିଁ ସକଳ ଯାତନା
ଭୁଲିଗଲି ଆରେ ଧନ ।
ହୃଦୟରେ ତୋତେ ଜଡ଼ାଇ ଧରିକି
ପାନ କରେଇଲି ସୁଧା ,
ଆଶା ସଞ୍ଚରିଲା ବଡ଼ ହୋଇ ନିଶ୍ଚେ
ନାଶିବୁ ମୋଅରି ବାଧା ।
ଲାଳନ ପାଳନ କଲି ଶରଧାରେ
ଧୀରେଧୀରେ ହେଲୁ ବଡ଼ ,
ଅବାଟରେ ଗଲେ ଆକଟ କରିକି
ଦେଇଛି ବି ଗାଳି, ମାଡ଼ ।
ସବୁବେଳେ କିନ୍ତୁ ତୋ କୁଶଳ ଇଛି
କରିଅଛି ବାରଓଷା ,
ଭଲ ମଣିଷଟେ ହୋଇ ତୁ ଯେମିତି
ପୂରେଇବୁ ମୋର ଆଶା ।
ଗୁହାରି ମୋହର ଶୁଣିଛନ୍ତି ସାଇଁ
ହୋଇଛୁ ତୁ ବଡ଼ଲୋକ ,
ଦୁଃଖୀ ଲୋକଙ୍କର ସାହାରା ହୋଇକି
ଦୂର କରୁଅଛୁ ଦୁଃଖ ।
ମୋଅରି ରକତେ ଗଢ଼ା ତୋ ଶରୀର
ମୁଁ ପରା ଅଟେ ତୋ ମାଆ ,
ଧନରେ ଯେଉଁଠି ରହିଥିଲେ ବି ତୁ
ସର୍ବ କୁଶଳରେ ଥାଆ ।।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ।