ସୁଦୁରାର କାକରାଖିଆ
ସୁଦୁରାର କାକରାଖିଆ
ମଲିକ୍ ଶ୍ରୀ ପ୍ରାଣକୃଷ୍ଣ
ସୁଦୁରାର ଘର ଖଜିରା l ସେ ସବୁ କଥାରେ ଅଧୀରା l ପହଁରାଠାରୁ ଚଅଁରା ପର୍ଯ୍ୟନ୍ତ ସବୁଠି ପଡ଼େ ତା’ ହାଜିରା l ଥରେ ତାଙ୍କ ଗାଆଁରେ ଯାତରା ହେଲା l ମକରା, ହଗୁରା, ଫକୀରାକୁ ସେ ସାଙ୍ଗ କଲା l ମନ ଖୁସିରେ ଜାମାପେଣ୍ଟ ପିନ୍ଧିଲା l ପାଞ୍ଚ ଦଶ ଟଙ୍କା ହାତେଇଲା l ବାଡ଼ିପଟ ଦେଇ ବାହାରିଲା l
ସେ ଯାତରା ମଝିରେ ପହଞ୍ଚିଲା l ସେଠାରେ ଚକରା ସାହୁ ଦୋକାନ ଥିଲା l ସେ ଦୋକାନକୁ ଚାହିଁଲା l ତା’ଦୋକାନରେ ବହୁତ କାକରା ଥିଲା l କାକର ଦେଖି ସୁଦୁରାର ଟାକଳା ମନଟା ବିକଳ ହେଲା l
ସୁଦୁରା କହିଲା, ‘’ ଫକୀରାରେ !
ଚାଆଲେ ଖାଇବା କାକରାରେ
ଟା’ ପରେ ପଶିବା ଅପେରାରେ
ଆହା କି ମଜା ଏ ଯାତରାରେ !’’
ସେ ମକରା, ଫକୀରା, ହଗୁରାଙ୍କୁ ନେଇ ଚକରା ସାହୁ ଦୋକାନକୁ ଗଲା l କାକରା ଦେବାକୁ ବରାଦ ଦେଲା l ଚକରା ସାହୁ ଦେଇ ଦେଇ ଚାଲିଲା l
କାକରା ପରେ କାକରା
ଖାଇ ଚାଲିଥାଏ ସୁଦୁରା
ପକେଟରେ ଭରା ଖୁଚୁରା
ତେଣୁ ସରସ ଟା’ ଚେହେରା l
କାକରା ଖିଆ ସାରିଲା l ସେ ହାତ ମୁହଁ ଧୋଇ ଆସିଲା l ରୁମାଲରେ ମୁହଁ ପୋଛିଲା l ଠାଣିରେ ଚାହିଁଲା l କେତେ ହେଲା ବୋଲି କହିଲା l ଚକରା ସାହୁ ଖଡ଼ି ଧରିଲା l କାଠପଟା ପରେ ଗାର ଟାଣିଲା l ହିସାବଟା ଯୋଡ଼ି ବସିଲା l ହାତ ବଢ଼ାଇ ସେ ରହିଲା l ଟଙ୍କା ତେତିଶଟା କହିଲା l ସୁଦୁରା ପକେଟରେ ହାତ ଭରିଲା l ଖୁଚୁରା ପଇସା କାଢ଼ିଲା l ତାକୁ ସିଏ ଗଣି ବସିଲା l ଟଙ୍କା ଅଠରଟା ହୋଇଲା l ତହୁଁ ତାର ମୁଣ୍ଡ ଘୂରିଲା l
ମକରା, ଫକୀରା, ହଗୁରା
କହିଲେ ତେଣେ ସଲା ସୁତୁରା
କହିଲେ, ଟଙ୍କା ଦେଇ ଆ ସୁଦୁରା
ଆମେ ଯାଉଅଛୁ ଅପେରା l
ସୁଦୁରା ସେମାନଙ୍କୁ ନେହୁରା ହେଲା l ଟଙ୍କା ଅଠରଟା ଅଛି ବୋଲି କହିଲା l ସେମାନଙ୍କଠାରୁ ପାଇବା ଆଶାରେ ଚାହିଁଲା l ଚଟ୍ କିନି ମକରା ବୁଲି ପଡ଼ିଲା ତାର କେତେ ଟଙ୍କା ହେଲା ବୋଲି ପଚାରିଲା l ଚକରା କହିଲା- ଚାରି ଟଙ୍କା l ମକରା ଚାରିଟଙ୍କା ଦେଇ ପଳାଇ ଗଲା l ହଗୁରା ଆସିଲା l ତା ‘ ନିଜର ତିନି ଟଙ୍କା ଦେଇ ବାଟ ଧରିଲା l ଫକୀରା ଥିଲା ଥିଲା କହିଲା, ‘’ ସୁଦୁରା ! ତୁ ମୋତେ କାକରା ଖାଇବାକୁ ଡ଼ାକିଥିଲୁ l ପଇସା ତୁ ଦେବୁ l ମୁଁ ଯାଉଛି l ତେଣେ ଅପେରା ଆରମ୍ଭ ହୋଇଯିବ l ‘’ ସେ ଚାଲିଗଲା l
ଚକରା ସାହୁ ଟଙ୍କା ମାଗିଲା l ସୁଦୁରା ଧରିଥିବା ଅଠର ଟଙ୍କା ଦେଲା l ଚକରା ଗଣିଲା l ଆଉ ଆଠ ଟଙ୍କା ଦେବାକୁ କହିଲା l ସୁଦୁରା ମୁଣ୍ଡ ତଳକୁ କଲା l ନରମ ହୋଇ ଶରମ ବୋଳା ସ୍ଵରରେ କହିଲା, ‘’ ଆଉ ପଇସା ନାହିଁ l ‘’
ଚକରା ଯେମିତି ଏତିକି ଶୁଣିଛି, ସେ କି ଆଉ ସମ୍ଭାଳି ହୁଏ ? ସେ ସୁଦୁରାକୁ ଧମକ ଦେଲା l ହାତ ମୁଠା ମୁଠା କରି ଉଠି ଆସିଲା l ମେଘପଋ ଗର୍ଜନ କଲା l
ଘଟଣାଟି କ’ଣ ବୋଲି ଜାଣିବାକୁ ଲୋକେ ଜମା ହେଲେ l ଚକରାକୁ ଶାନ୍ତ କରାଇଲେ l ସୁଦୁରାଠୁଁ ସବୁକଥା ବୁଝିଲେ l ଖଜିରା ଗାଆଁର ପାକଲା ବୁଢ଼ା ପ୍ରବୀରା l ସେ ସୁଦୁରା ଠାରୁ ସବୁକଥା ଶୁଣି କହିଲେ –
‘’ ଆହାରେ ବିଚରା ସୁଦୁରା !
ଲୋଭରେ ଖାଇଲୁ କାକରା
କାକରା ନୁହେଁ ସେ ଖତରା
କଥା ହେଲା ବଡ଼ ନାକରା
ଏବେ ପାଇଲୁ ତୁ ଘୋଷରା
କାହାନ୍ତି ତୋ’ ସାଙ୍ଗ
ମକରା, ହଗୁରା, ଫକୀରା ?’’
ସୁଦୁରା ମୁଣ୍ଡ ତଳକୁ କଲା l ପ୍ରବୀରା କହିଲେ, ‘’ ଚକରାରେ ! ସୁଦୁରା ଥରୁଛି ଡ଼ରରେ l ତାକୁ ଏବେ ଛାଡ଼ି ଦେଏରେ ! ‘’
ଚକରା ସାହୁ ତ ବିଗିଡ଼ିଥିଲା l ସେ ଏଣୁ ତେଣୁ ବହେ ବକିଲା l ଶେଷରେ ସେ ଭାବି କହିଲା, ‘’ ଯଦି ଏଠାରେ ରହି ସେ ମୋର ଅଇଁଠା ବାସନତକ ମାଜି ସଫା କରି ଦେଇଯିବ ତେବେ ଆଠ ଟଙ୍କା ଛାଡ଼ି ଦେବି l
ଶେଷରେ ସୁଦୁରା ବାଧ୍ୟ ହେଲା l ଆଠ ଟଙ୍କା ପାଇଁ ଅଇଁଠା ବାସନ ସଫା କଲା l କାକରା ଖିଆର ମଜା ପାଇଲା l
ସେ ଆଉ ଅପେରା ଦେଖି ଯିବ କ’ଣ କାନମୁଣ୍ଡ ଆଉଁସି ଘରକୁ ଫେରିଲା l