Library
ସଦଗୁରୁ
ସଦଗୁରୁ
ପିଲାମାନେ !! 'ସଦଗୁରୁ' କାହାକୁ କୁହନ୍ତି ଜାଣିଚ ?? ସଦଗୁରୁ ହେଉଛନ୍ତି ସେଇ ବ୍ଯକ୍ତି ଯିଏ ନିଜେ ବ୍ରହ୍ମଜ୍ଞାନୀ ଆଉ ସାଧାରଣ ମଣିଷ ମାନଙ୍କୁ ଆଧ୍ୟାତ୍ମିକ ପଥରେ ପରିଚାଳିତ କରେଇ ଜୀବନର ଚରମ ଲକ୍ଷ ରେ ପହଞ୍ଚାଇ ଦିଅନ୍ତି । ଅର୍ଥାତ୍ ମୋକ୍ଷ ପ୍ରାପ୍ତିରେ ସହାୟକ ହୁଅନ୍ତି । ଆମ ପବିତ୍ର ଭାରତବର୍ଷରେ ଅନେକ ସଦଗୁରୁ ଆବିର୍ଭୂତ ହୋଇଛନ୍ତି । ସେଇଥି ପାଇଁ ଆମ ଭାରତକୁ ଆଧ୍ୟାତ୍ମିକ ଦେଶ ବୋଲି କୁହାଯାଏ । ଆଜି ମୁଁ ସେଇଭଳି ଜଣେ ସଦଗୁରୁଙ୍କ ଜୀବନୀ ଉଲ୍ଲେଖ କରିବି ସଂକ୍ଷେପ ରେ । ତୁମେମାନେ ଖୋଜି ବାହାର କରିବ ସେ ସଦଗୁରୁ କିଏ ?? ତାଙ୍କ ନାମ କ'ଣ ?? ଯିଏ ସଠିକ୍ ନାମ କହିବ ସେ 'ପଣ୍ଡିତ ଶିରୋମଣି' ବୋଲି ଅଭିହିତ ହେବ । ଠିକ୍ ଅଛି ପିଲାମାନେ !! ମୁଁ ଆରମ୍ଭ କରୁଚି
ଅବିଭାଜିତ ବଙ୍ଗର ନଦିୟା ଜିଲ୍ଲାର ମେହରପୁର ମହକୁମାରେ କୁତବପୁର ବୋଲି ଗାଁ ଟିଏ ଅଛି । ବିଭାଜନ ପରେ ବର୍ତ୍ତମାନ ଏହା ବାଙ୍ଗଲାଦେଶ ରେ ଅଛି । ସେଇ ଗାଁରେ ଭୁବନମୋହନ ଭଟ୍ଟାଚାର୍ଯ୍ୟ ବୋଲି ଜଣେ ନୈଷ୍ଠିକ ବ୍ରାହ୍ମଣ ବାସ କରୁଥିଲେ । ତାଙ୍କର ଧର୍ମପତ୍ନୀଙ୍କ ନାମ ମାଣିକ୍ଯସୁନ୍ଦରୀ । ଦୁହେଁ ଖୁବ୍ ପରୋପକାରୀ ଆଉ ଧର୍ମପରାୟଣ । ହେଲେ ଦୁଃଖ ର ବିଷୟ ସେମାନଙ୍କ ର ବିବାହ ର ୭୵ ୮ ବିତି ଯାଇଥିଲେ ବି ସନ୍ତାନ ନଥିଲେ । ହେଲେ ମାଣିକ୍ଯସୁନ୍ଦରୀ ଗ୍ରାମ ର ସମସ୍ତ ପିଲାଙ୍କୁ ପୁତ୍ରବତ୍ ସ୍ନେହ କରୁଥିଲେ । ସେ ପୁତ୍ର ସନ୍ତାନ ପ୍ରାପ୍ତି ନିମିତ୍ତ କାର୍ତ୍ତିକବ୍ରତ ପାଳନ କରିବା ଆରମ୍ଭ କଲେ । ବହୁତ ନିଷ୍ଠାର ସହ ଦୁଇ ବର୍ଷ ବ୍ରତ ପାଳନ କରି ସନ୍ତାନସମ୍ଭବା ହେଲେ । ଗର୍ଭ ଧାରଣ କରିବା ପରେ ପରେ ସେ ଅନେକ ଅଲୌକିକ ସ୍ବପ୍ନ ସବୁ ଦେଖିବାକୁ ଲାଗିଲେ । ପ୍ରସବ ପୂର୍ବରୁ ପିତ୍ରାଳୟ ରାଧାକାନ୍ତପୁର କୁ ଗମନ କଲେ । ୧୮୮୦ ମସିହା ରାକ୍ଷୀପୂର୍ଣିମା ଗୁରୁବାର ରାତିରେ ଏକ ପୁତ୍ର ସନ୍ତାନ ପ୍ରାପ୍ତ ହେଲେ ।
ପିତା ଭୁବନମୋହନ ପୁତ୍ର ର ନାମକରଣ ନିମନ୍ତେ ନିଜର କୁଳଗୁରୁ ଭାସ୍କରାନନ୍ଦ ଙ୍କୁ ନିମନ୍ତ୍ରଣ କଲେ । ସେ ପୁତ୍ର ର ନାମକରଣ କଲେ । ଆଉ ତାଙ୍କ କୋଷ୍ଠୀ ଦେଖି ଆଶ୍ଚର୍ଯ୍ୟ ହେଇଗଲେ ଆଉ କହିଲେ , ୟେ ବଡ ହେଇ ରାଜା ହେବ ନ ହେଲେ ସନ୍ନ୍ୟାସୀ ହେବ । ଭୁବନମୋହନ ଟିକେ ଚିନ୍ତିତ ହେଲେ କାଳେ ପୁତ୍ର ସନ୍ନ୍ୟାସୀ ହେଇଯିବ କି !! ପିଲେ ଏଠାରେ ମୁଁ ଶିଶୁଟି ର ନାମ ଉଲ୍ଲେଖ କଲି ନାହଁ । ତୁମେମାନେ ଖୋଜି ବାହାର କରିବ ମନେ ଅଛି ତ ???
ଧୀରେ ଧୀରେ ସେ ବଡ ହେଲେ । ଚାଟଶାଳୀ ରେ ନାମ ଲେଖାଇଲେ । ବାଲ୍ୟକାଳରେ ଖୁବ୍ ଚପଳ ଆଉ ବିଚକ୍ଷଣ ଥିଲେ । ଦିନକର ଘଟଣା ଘର ନିକଟରେ ଥିବା ଚଣ୍ଡି ମଣ୍ଡପ କୁ ସଞ ଦୀପ ଦେବାକୁ ଗଲେ । ହଠାତ୍ ଦୀପଟି ଲିଭିଗଲା ଆଉ ସ୍ବୟଂ ଦଶଭୁଜା ତାଙ୍କ ଆଗରେ ଆବିର୍ଭୂତା ହେଲେ । ଭୟରେ ରେ ଦୀପ ଫିଙ୍ଗି ଦେଇ ଧାଇଁ ପଳେଇ ଆସିଲେ । ମାଁ ତାଙ୍କୁ ବୁଝାଇ ଦେଲେ ମୁଁ ଯେମିତି ତୋର ମାଁ ସେ ସେମିତି ଜଗତର ମାଁ । ମାଁ ଙ୍କୁ କଣ କିଏ ଭୟ କରେ ??
ମାତୁଳାଳୟ କୁ ଗମନ କଲେ ପରବର୍ତ୍ତୀ ଶିକ୍ଷା ଗ୍ରହଣ ନିମନ୍ତେ । ଦଶ ବର୍ଷ ବୟସରେ ତାଙ୍କ ବ୍ରତୋପନୟନ ହେଲା । ମାମୁଁଘର ଥିବା ସମୟରେ ତାଙ୍କ ମାତୃ ବିୟୋଗ ହେଲା । ମାଁ ମୃତ୍ୟୁ ପୂର୍ବରୁ କହି ଯାଇଥିଲେ ତାକୁ କହିବ ମୁଁ ଜଗଜ୍ଜନନୀ ଙ୍କ କୋଳରେ ତାକୁ ଟେକି ଦେଇ ଯାଉଛି । ଏବେ ସେଇ ମାଁ ତାର ଭାର ନେଲେ ।
ହାଇସ୍କୁଲ ଶିକ୍ଷା ସାରି ସେ ସିଭିଲ ଇଞ୍ଜିନିୟରିଙ୍ଗ ରେ ଡିପ୍ଲୋମା କଲେ । ପିତା ତାଙ୍କର ବିବାହ ସୁଧାଂଶୁବାଳା ଙ୍କ ସହ କରେଇ ଦେଲେ । ସେ ସତୀ ସାଧ୍ଵୀ ଆଉ ପତିବ୍ରତା ଥିଲେ । ନାରାୟଣପୁର ରେ ଚାକିରୀ କରିବା ସମୟରେ ହଠାତ୍ ଦିନେ ନିଜ କକ୍ଷରେ ସୁଧାଂଶୁବାଳା ଙ୍କ ଛାୟାମୂର୍ତ୍ତି ଦେଖି ଚମକି ପଡିଲେ । ସେ ଖୁବ୍ ବିଚଳିତ ହେଇ ପଡିଲେ । ନିଶ୍ଚୟ ଘରେ କିଛି ଅଘଟଣ ଘଟିଛି ବୋଲି ଭାବିଲେ । ସତ କୁ ସତ ଗାଁ ରେ ପହଞ୍ଚି ଜାଣିଲେ ଯେତେବେଳ ସେ ଛାୟାମୂର୍ତ୍ତି ଦେଖିଥିଲେ ତାର କିଛ ସମୟ ପୂର୍ବ ରୁ ହିଁ ସୁଧାଂଶୁବାଳା ଦେହତ୍ୟାଗ କରିଥିଲେ । ଏଇ ଘଟଣା ପରଠାରୁ ତାଙ୍କ ଜୀବନର ମୋଡ ବଦଳି ଯାଇଥିଲା । ଆହୁରି ୨୵୪ ଥର ପତ୍ନୀଙ୍କ ଛାୟାମୂର୍ତ୍ତି ଦେଖିଲେ ଆଉ କଥୋପକଥନ ବି କଲେ । ବ୍ୟାକୁଳ ହୋଇ ଉଠିଲେ ଜାଣିବା ପାଇଁ ମୃତ୍ଯୁ ପରେ ଆତ୍ମାର କଣ ହୁଏ ସେ କୋଉଠି ରୁହେ । ତାର ଗତି କଣ ???
ସେ ପରକାଳ ବିଷୟରେ ଅଧିକ ଜାଣିବା ପାଇଁ ମାଡ୍ରାସ ର ଥିଓସୋଫିକଲ ସୋସାଇଟିରେ ଜଏନ୍ କଲେ ।ଅଳ୍ପଦିନ ଭିତରେ ସମସ୍ତ ଶିକ୍ଷା ଅକ୍ତିଆର କରିଦେଲେ । ହେଲେ ତାଙ୍କ ପିପାସା ମେଣ୍ଟିଲା ନାହିଁ । ସେ ପୁଣି ଘୂରି ବୁଲିଲେ । ଦିନେ ସ୍ବପ୍ନ ରେ ଗୋଟେ ମନ୍ତ୍ର ପ୍ରାପ୍ତ ହେଲେ ଜଣେ ସାଧୁଙ୍କ ଠାରୁ । ହେଲେ କେହି ହେଲେ ସେ ମନ୍ତ୍ର ଜପର ବିଧି ବିଷୟରେ କହି ପାରିଲେନି । ଶେଷରେ ଆତ୍ମହତ୍ୟାର ସଂକଳ୍ପ ନେଲେ । ସେଇ ଦିନ ପୁଣି ସ୍ବପ୍ନ ରେ ନିଜ ଗୁରୁଙ୍କ ବିଷୟରେ ଅବଗତ ହେଲେ ।
ମହାନ୍ ତାନ୍ତ୍ରିକ ବାମାକ୍ଷେପା ତାଙ୍କୁ ଶିଷ୍ଯ ରୂପେ ଗ୍ରହଣ କରି ସେଇ ନିର୍ଦ୍ଧିଷ୍ଟ ମନ୍ତ୍ର ରେ ପ୍ରାଣ ପ୍ରତିଷ୍ଠା କଲେ । ଚିତ୍ତାସାଧନା କରାଇ ଜଗଜ୍ଜନନୀ ଙ୍କ ସହ ତାଙ୍କ ସାକ୍ଷାତ କରେଇ ଦେଲେ । ସ୍ବୟଂ ଜଗଜ୍ଜନନୀ ତାଙ୍କ ସ୍ତ୍ରୀ ରୂପରେ ଯେତେବେଳ ସେ ଇଚ୍ଛା କରିବେ ଦେଖା ଦେବେ ବୋଲି କଥା ଦେଲେ । ଯେତେବେଳ ବାରମ୍ବାର ଦେଖିଲେ ମାଁ ତାଙ୍କ ଦେହରୁ ବାହାରି ତାଙ୍କ ଦେହରେ ପୁଣି ମିଶି ଯାଉଛନ୍ତି । ସେତେବେଳ ତାଙ୍କ ମନରେ ଅନେକ ପ୍ରଶ୍ନ ଉଠିଲା । ସେ ପୁଣି ବାମାକ୍ଷେପାଙ୍କ ପାଖକୁ ଗଲେ । ସେ ଜ୍ଞାନ ସାଧନା କରିବାକୁ ଉପଦେଶ ଦେଲେ ।
ପୁଣି ଘୂରି ବୁଲିଲେ ଗୁରୁ ପାଇବା ପାଇଁ । ଯେଉଁ ସାଧୁ ସ୍ବପ୍ନ ରେ ମନ୍ତ୍ର ପ୍ରଦାନ କରିଥିଲେ ସେଇ ସାଧୁଙ୍କୁ ଏକ ଧର୍ମ ସଭାରେ ଦେଖିଲେ । ତାଙ୍କ ପାଦ ଧରି ପଡିଗଲେ । ସମସ୍ତ ଘଟଣା ବଣ୍ଣନା କରି ତାଙ୍କୁ ଗୁରୁ ରୂପରେ ବରଣ କଲେ । ସେ ହେଉଛନ୍ତି ସ୍ବାମୀ ସଚ୍ଚିଦାନନ୍ଦ ସରସ୍ଵତୀ । ସେଇଠାରେ ସନ୍ନ୍ୟାସ ଗ୍ରହଣ କରି ଜ୍ଞାନ ପ୍ରାପ୍ତ ହେଲେ । ସଚ୍ଚିଦାନନ୍ଦ କହିଲେ ତମେ ଯେଉଁ ଜ୍ଞାନ ଆହରଣ କଲ ତାକୁ ଉପଲବ୍ଧି କରିବା ପାଇଁ ଯୋଗ ଶିକ୍ଷା କରିବାକୁ ପଡିବ । ଯୋଗୀଗୁରୁ ଖୋଜି ଯୋଗ ଶିକ୍ଷା କର ।
ଯୋଗଗୁରୁ ଖୋଜି ଖୋଜି ଆସି ପହଞ୍ଚିଲେ ନିଘଞ୍ଚ ଅରଣ୍ୟ ଭିତରେ । ରାତି ହେଇ ଯିବାରୁ ଏକ ବୃକ୍ଷ କୋଟର ରେ ଆଶ୍ରୟ ନେଲେ । ସକାଳେ ଉଠି ଦେଖିଲେ । ଜଣେ ବ୍ୟକ୍ତି ବୃକ୍ଷ ତଳେ ବସି ଚିଲମ ଟାଣୁଛନ୍ତି । ଓହ୍ଲାଇ ତାଙ୍କ ପାଖକୁ ଗଲେ । ସେଇ ଥିଲେ ତାଙ୍କ ଯୋଗଗୁରୁ ସୁମେରୁ ଦାସ ଜୀ । ତାଙ୍କ ଠାରୁ ଯୋଗର ସମସ୍ତ ଶିକ୍ଷା ଶେଷ କଲେ ତିନିମାସ ଭିତରେ । ସେ କହିଲେ ଏବେ ତୁମେ ଯାହା ସବୁ ଶିକ୍ଷା କଲ ଅନୁଶୀଳନ କର । ଏଥି ନିମନ୍ତେ ପୁଷ୍ଟିକର ଖାଦ୍ଯ ଆବଶ୍ୟକ । କୌଣସି ଗୃହସ୍ଥ ଙ୍କ ଆଶ୍ରୟ ନେଇ ସାଧନାକୁ ଜାରି ରଖ । ଅଚିରେ ନିର୍ବିକଳ୍ପ ସମାଧି ଲାଭ କରିବ ।
ପିଲାମାନେ !! ନିର୍ବିକଳ୍ପ ସମାଧି ହେଉଛି ସମସ୍ତ ସାଧନାର ଚରମ ପରିଣତି । ଯେଉଁଠାରେ ବ୍ରହ୍ମ ସାକ୍ଷାତକାର ହୁଏ । ସେହିଠାରୁ କହି ଫେରନ୍ତି ନାହିଁ । ବ୍ରହ୍ମରେ ଲୀନ ହେଇ ଯାଆନ୍ତି । ଯିଏ ଫେରି ଆସନ୍ତି ସିଏ ଗୁରୁ ରୂପରେ ପ୍ରତିଷ୍ଠିତ ହୁଅନ୍ତି । ତାଙ୍କୁ ହିଁ କୁହାଯାଏ ସଦଗୁରୁ ।
କାମାକ୍ଷା ର ଯଜ୍ଞେଶ୍ବର ବିଶ୍ବାସ ଙ୍କ ଗୃହରେ ରହି ସେ ଯୋଗ ସାଧନା କଲେ । ଯଜ୍ଞେଶ୍ବର ବାବୁଙ୍କ ପତ୍ନୀ ପୁତ୍ରବତ୍ ତାଙ୍କର ଯତ୍ନ ନେଲେ । ସୁଷମ ଖାଦ୍ୟପେୟ ର ବ୍ୟବସ୍ଥା କଲେ । ଦିନେ କାମାକ୍ଷା ପାହାଡରେ ବସି ଯୋଗ ସାଧନା କରୁ କରୁ ନିର୍ବିକଳ୍ପ ସମାଧି ଲାଭ କଲେ । ଆଉ 'ମୁଁ ଗୁରୁ' ଏଇ ଭାବ ନେଇ ଫେରି ଆସିଲେ ।
କୁମ୍ଭମେଳାରେ ସଚ୍ଚିଦାନନ୍ଦ ଙ୍କ ସହ ଦେଖାହେଲା । ସେ ସମୟର ଶୃଙ୍ଗେରୀ ମଠର ଶଙ୍କରାଚାର୍ଯ୍ୟ ଉପସ୍ଥିତ ଥିଲେ । ସେ ତାଙ୍କ ଜ୍ଞାନର ପରୀକ୍ଷା ନେଇ ପରମହଂସତ୍ବ ପ୍ରଦାନ କଲେ ଆଉ ତାଙ୍କ ସନ୍ନ୍ୟାସୀ ଦଣ୍ଡୀ କାଢି ଦିଆଗଲା । ସଚ୍ଚିଦାନନ୍ଦ ତାଙ୍କୁ ଗୁରୁଭାର ଅର୍ପଣ କଲେ ।
ପରବର୍ତ୍ତୀ ସମୟରେ କାଶୀରେ ମାତା ଅନ୍ନପୂର୍ଣ୍ଣା ଙ୍କୁ ପରୀକ୍ଷା କରିବାକୁ ଯାଇ ତାଙ୍କ ସାକ୍ଷାତକାର ପାଇଲେ । ସେହିଠାରେ ଅନ୍ନପୂର୍ଣ୍ଣା କହିଲେ ତଥାପି ତୋର ସାଧନା ପୂର୍ଣ୍ଣ ହେଇ ନାହିଁ । ଭଗବାନ ଙ୍କ ଲୀଳା ଜଗତ ବିଷୟରେ ଏବେ ବି ତୁ ଅନଭିଜ୍ଞ । ଭାବ ସାଧନା କର ତେବେ ଯାଇ ତୁ ପୂର୍ଣ୍ଣ ଜ୍ଞାନରେ ପ୍ରତିଷ୍ଠିତ ହେବୁ ।
ଏକଦା ଜ୍ଞାନ ସାଧନା ପରେ ସଚ୍ଚିଦାନନ୍ଦ ଙ୍କ ସହ ତୀର୍ଥ ଭ୍ରମଣ ରେ ଥିବା ସମୟରେ ଗୌରୀ ମା ଙ୍କ ସହ ସାକ୍ଷାତ ହେଇଥିଲା । ସେ କହିଥିଲେ ତମେ ଯଦି କେବେ ନିର୍ବିକଳ୍ପ ସମାଧି ଲାଭ କର ତେବେ ଆସି ମୋ ସହ ସାକ୍ଷାତ କରିବ । ତାଙ୍କର ସେଇ କଥା ମନେ ପଡିଲା । ସେ ଯାଇ ଗୌରୀ ମା ଙ୍କ ପାଖରେ ପହଞ୍ଚିଲେ । ଗୌରୀ ମାଁ ଙ୍କ ଗୋଟିଏ ସ୍ପର୍ଶ ମାତ୍ରେ ହିଁ ସେ ଭାବ ସମାଧି ଲାଭ କଲେ । କୁହାଯାଏ ସେ ସମୟରେ ଗୌରୀ ମାନଙ୍କ ପ୍ରକୃତ ବୟସ ଚାରି ଶହ ବର୍ଷ ଥିଲା । କିନ୍ତୁ ସେ ୨୫୵୨୬ ବର୍ଷ ବୟସ୍କା ଦେଖା ଯାଆନ୍ତି । ସେ କାଶ୍ମୀର ର ବ୍ରାହ୍ମଣ କନ୍ୟା ଥିଲେ । ସେ ନିଜର ସମସ୍ତ ସାଧନାର ଶକ୍ତିକୁ ତାଙ୍କ ଭିତରକୁ ସଂଚାରିତ କରି ଦେଇଥିଲେ । ସେଇଥି ପାଇଁ ଗୋଟିଏ ଦିନରେ ହିଁ ଭାବ ସାଧନା ସଂପର୍ଣ୍ଣ ହେଇ ଯାଇଥିଲା ।
ସେ ଏକମାତ୍ର ଗୁରୁ ଯିଏ ତନ୍ତ୍ର ସାଧନା , ଜ୍ଞାନ ସାଧନା , ଯୋଗ ସାଧନା ଓ ଭାବ ସାଧନା ମାତ୍ର ତିନିବର୍ଷ ଭିତରେ କରିଥିଲେ । ଭଗବତ ପ୍ରାପ୍ତି ନିମନ୍ତେ ଯେଉଁ ଚାରିପଥ ଅଛି ସେ ସମସ୍ତ ସାଧନା ସେ କରିଥିଲେ । ତେଣୁ ସେ ସାର୍ବଭୌମ ଗୁରୁ । ପିଲେ !! ଏଥର ତମେମାନେ ଖୋଜି ବାହାର କର ୟେ ଗୁରୁ କିଏ ?? ତାଙ୍କ ନାମ କଣ ??
