Payable @ କୋଲକାତା

ହଁ, ଶୁଣୁଛ ! ଗାଆଁରେ ସମସ୍ତେ କହୁଛନ୍ତି, ଆମ ରୀନା କୁଆଡେ କଲିକତା ଆଇ.ଆଇ.ଏମ୍.ରେ ଜାଗା ପାଇଛି l 

ଜେଜେମା ରୁକୁ ବୁଢ଼ୀର ଖୁସି କହିଲେ ନ ସରେ...

ଉପର ଓ ତଳ ମାଢିରେ ମିଶି ପାଞ୍ଚୋଟି ଆଗ ଦାନ୍ତ ନାହିଁ l ଓଠ ଚାପି ଚାପି ସ୍ଵାମୀ ଦିଲୁ ବୁଢ଼ା ସଙ୍ଗେ କଥା ହୁଅନ୍ତି ଜେଜେମା l ଚେଷ୍ଟା କରି ବି ଓଠ ଚାପି ପାରୁନାହାନ୍ତି ରୁକୁ ବୁଢ଼ୀ l ଆଜି କିନ୍ତୁ ଖୋଲା ମେଲା ହସ l ବାର୍ଦ୍ଧକ୍ୟର ଛାପ ମୁହଁର ପ୍ରତିଟି ଚର୍ମ ଉପରେ l କୁଂଚା ମୁଂଚା ମୁହଁରେ ଦାନ୍ତବିହୀନ ହସ ଦେଖି ଇଚ୍ଛା ନ ଥାଇ ବି ହସିଦେଲେ ଦିଲୁ ବୁଢ଼ା l 

ରୁକ୍ମିଣୀଙ୍କର ବିବାହ ସମୟର ସୌନ୍ଦର୍ଯ୍ୟ ଆଉ ମନେ ନାହିଁ l ସେଦିନର ଯୁବତୀ ରୁକ୍ମିଣୀ ଆଜି ରୁକୁ ବୁଢ଼ୀ l ଚେହେରା ଉପରେ ବାର୍ଦ୍ଧକ୍ୟର ଭୂସ୍ଖଳନ, ହୃଦୟ କିନ୍ତୁ ସବୁ ଦିନ ପରି ସେମିତି କୋମଳ l ବୟସ ସିନା ଦେହକୁ ଅଜଗର ପରି ଗିଳିଦିଏ, ମନ ଆଉ ହୃଦୟକୁ କେହି କାବୁ କରି ପାରେନି l ସେଦିନ ଯେମିତି ଥିଲା, ଆଜି ବି ସେମିତି l ରୁକୁ ବୁଢ଼ୀ ନାତୁଣୀର ପରୀକ୍ଷା ଫଳକୁ ନେଇ ଉନ୍ମାଦିତ l 

ତମେ କଣ ଆଦୌ ଖୁସି ନୁହଁ ଆମ ରୀନା ପାଇଁ l 

ହଁ ଖୁସି ଅଛି ଯେ, କିନ୍ତୁ !!!

କିନ୍ତୁ ଫିନ୍ତୁ କିଛି ନାହିଁ, ଚାଲ ଗାଆଁରେ ମିଠା ବାଣ୍ଟିବା l ଖୁସିରେ କୋଳେଇ ନେଲେ ଦିଲୁ ବୁଢାକୁ l ଖୁସିର ଅମାପ ଦୈଘ୍ୟ ପ୍ରସ୍ଥ l କେବେ କିଛି ଲକ୍ଷ୍ମଣ ରେଖା ନିର୍ଦ୍ଧାରିତ ହୋଇନାହିଁ ଖୁସିକୁ ଆକଟ କରିବା ପାଇଁ l ଖୁସିର ବିଶାଳ ସାମ୍ରାଜ୍ୟ, ନା କେହି ପ୍ରତିଦ୍ୱନ୍ଦୀ, ନା କେଉଁ ପ୍ରତିଯୋଗିତା l ଯେମିତି, ଖୁସିର ଗୋଟେ ନିଜସ୍ଵ ଇଲାକା ଥାଏ l 

ଶୁଣ ରୁକୁ ! କାଲି ରାତିରେ ରୀନା ଫୋନ କରି ମୋତେ ସବୁ କଥା କହିଥିଲା l ପନ୍ଦର ଲକ୍ଷ ଲାଗିବ !!!!

କଣ ହେଲା ସେଇଠୁ !

ମୋର ଗୋଟାଏ ରୂପା ବାଙ୍କି ଅଛି ନା l ମୋ ବୋଉ ମୋତେ ଦେଇଥିଲା ବାହାଘର ବେଳେ l ଜାଣିଛ କେତେ ଓଜନ l ଅଧାକିଲୋରୁ ଅଧିକ ହେବ l ବିକି ଦେବା l 

ଇଚ୍ଛା ନ ଥାଇ ହସ ଭିତରେ ଅଳ୍ପ ସ୍ନେହ, ଅଳ୍ପ ଆନ୍ତରିକତା ଛୁପି ରହିଥାଏ l ଅସହାୟ ମଣିଷ ମାନଙ୍କର ପ୍ରତି ମୁହୂର୍ତ୍ତ ଗୋଟାଏ ଗୋଟାଏ ଗଳ୍ପ ପରି, ଉଦାସୀନତା ଭରା...., ସରଳତା ପାଖରେ ଅଭିନୟର ଜାଗା ନାହିଁ, ସବୁ ସହଜ l ଆକାଶ ଭରା ଦୁଃଖକୁ ପିଠିରେ ଲଦି ଚାଲିବାର କ୍ଷମତା ଭିତରେ ଅସହାୟତା ହାରିଯାଏ l 

ହସିଲ କାହିଁକି ? ପନ୍ଦର ଲକ୍ଷ କଣ ବେଶି ଟଙ୍କା ?????

ଜୀବନରେ ଅନେକ ପ୍ରଶ୍ନ ଏମତି ଭାରି ସୁଆଦିଆ l ବିଚାରୀ ନିରକ୍ଷର ବୁଢ଼ୀର ଅବାନ୍ତର ପ୍ରଶ୍ନ ଭିତରେ କିଛି ଭାବପ୍ରବଣତା, ଆଉ କିଛି ଉତ୍କର୍ଷତା ଛୁପି ରହିଥାଏ l ଗାଲକୁ ଟାଣି ଦେଇ ପ୍ରେମଭରା ଉଷ୍ମତାକୁ ଛାପିଦେଲେ ବୁଢ଼ୀର ରୁଗ୍ଣ ଗାଲ ଉପରେ l ଲାଜରେ ଭାଙ୍ଗି ପଡ଼ିଲେ ରୁକୁ ବୁଢ଼ୀ l 

ରୁକ୍ମିଣୀ ଦେବୀ କିମ୍ବା ଦିଲୀପ ବଳିଆର ସିଂହ କହିଲେ ଗାଆଁରେ କେହି ଚିହ୍ନନ୍ତି ନାହିଁ l ଦିଲୁ ବୁଢ଼ା ଓ ରୁକୁ ବୁଢ଼ୀ ଭାବେ ବେଶ୍ ପରିଚିତ ସେମାନେ ଗାଆଁ ଭିତରେ l ଅଳ୍ପ ବୟସରେ ପୁଅ ବୋହୂଙ୍କୁ ହରେଇଛନ୍ତି ସେମାନେ l ତା ପରେ, ନାତୁଣୀ ରୀନାର ହାତ ଧରି ତାକୁ ଏଲ୍.କେ.ଜି.ରୁ ନେଇ କଲିକତା ଆଇ.ଆଇ.ଏମ୍.ରେ ପହଞ୍ଚିବା ଭିତରେ ଅନେକ ଘଟଣା ଘଟି ଯାଇଛି ସେମାନଙ୍କ ଜୀବନରେ l ବୟସ ଆସି କେତେବେଳେ ମାଡ଼ି ବସିଲା ବୁଝି ପାରିଲେନି ସେମାନେ l ବିବାହର ଠିକ୍ ସାତ ବର୍ଷ, ଦୁର୍ଘଟଣାରେ ପୁଅ ବୋହୂକୁ ହରେଇବାର ଦୁଃଖକୁ କଣ ମାପି ହୁଏ ? ଦୁଃଖ ବହୁରୂପୀ, ଦୁଃଖର କିନ୍ତୁ ଏଇ ବିକଟାଳ ରୂପ ପାଖରେ ଜୀବନଟା ସମ୍ପୂର୍ଣ୍ଣ ହାରିଯାଏ l ଆଖିର ସୀମିତ ଲୁହ ଶୁଖିଯିବା ପରେ କଷ୍ଟ ଦେହସୁହା ହୋଇଉଠେ l ନିରୁଦ୍ଦିଷ୍ଟ ଲକ୍ଷ୍ୟ, ଦିଶାହୀନ ମରୁଯାତ୍ରା l ତଥାପି ସେମାନେ ରାସ୍ତା ଭଟକି ନାହାନ୍ତି, ଚାଲିଛନ୍ତି ଆଗକୁ ରୀନାର ହାତ ଧରି, ନିରନ୍ତର ଭାବରେ l 

ରୀନାର ମାମୁଁ ସରକାରୀ ବିଭାଗରେ କନିଷ୍ଠ ଯନ୍ତ୍ରୀ l ଦିଲୁ ବୁଢ଼ା ଫୋନ କରି ତାଙ୍କୁ ଜଣେଇଲେ, 

ମାମୁଁ କହିଲେ ସବୁ ଶୁଣିଛି, ରୀନା ମୋତେ ରାତିରେ ଫୋନ୍ କରି କହିଥିଲା l 

 

ଫୋନ ପାଖରେ ଛିଡ଼ା ହୋଇ କିଏ ଜଣେ ଚିତ୍କାର କରୁଥିଲା "କାହିଁକି ଫୋନ ଉଠେଇଲ !!!! ପଇସା ମାଗିବେ" !!! 

କିଛି ସାହାଯ୍ୟ ମାଗିବା ଆଗରୁ ଜଣେ ମହିଳାର କର୍କଶ କଥା ଶୁଣି ଦିଲୁ ବୁଢ଼ା ଫୋନ ରଖିଦେଲେ l ମନେ ମନେ ଭାବିଲେ କାହାଠୁ କିଛି ସାହାଯ୍ୟ ଦରକାର ନାହିଁ l ପୃଥିବୀର ଏଇ ଭିଡ ଭିତରେ ସମସ୍ତେ କେତେ ନିଜର ଲାଗନ୍ତି l ବାସ୍ତବତା କିନ୍ତୁ ଭିନ୍ନ l ସମ୍ପର୍କର ମରୀଚିକା, ଆଗରେ ବିଛେଇ ପଡ଼ିଛି, ଧାଇଁବା ବୃଥା l ଆଜି ଦିଲୁ ବୁଢ଼ାକୁ ଲାଗୁଥିଲା, ଭିଡ ଭିତରେ ସେ ନିଜେ ହିଁ ହଜି ଯାଇଛନ୍ତି, ଚିହ୍ନା ଚିହ୍ନା ମୁହଁ ସବୁ ଛୁପି ଯାଉଛନ୍ତି ଖୁମ୍ବ ଆଢ଼ୁଆଳରେ l 

ବ୍ୟାଙ୍କ୍ ଭିତରେ ବେଞ୍ଚ ଉପରେ ବସି ଢୁଳାଉ ଥାଆନ୍ତି ଦିଲୁ ବୁଢ଼ା l ଏଜେଣ୍ଟ ଆସି କାନ ପାଖରେ କହିଲା ପନ୍ଦର ଲକ୍ଷ ଷ୍ଟଡି ଲୋନ ପାଇଁ ତିନି ଲକ୍ଷ ଲାଗିବ l ହାଇ ମାରି କାନ୍ଥକୁ ଡେରି ବସି ରହିଲେ ଜୀବନହୀନ ପ୍ରତିମୂର୍ତ୍ତିଟିଏ ପରି l ତିନି ଲକ୍ଷ ପୁଣି କୁଆଡୁ ଆସିବ !!! ଏଇଟା ନିଶ୍ଚୟ ଏଜେଣ୍ଟର ଚାଲାକି l ସାହସ ହେଲା ନାହିଁ ଭିତରକୁ ଯାଇ ବେଙ୍କ ମେନେଜର ସଙ୍ଗେ କଥା ହେବାକୁ l ଚୁପଚାପ୍ ବ୍ୟାଙ୍କ୍ ଭିତରୁ ବାହାରି ଆସିଲେ ଦିଲୁ ବୁଢ଼ା l ଏଜେଣ୍ଟ ବୁଝି ପାରିଲା, ବୁଢ଼ା କାମକୁ ନୁହଁ l କ୍ଳାନ୍ତଶ୍ରାନ୍ତ ବୁଢ଼ା, ବୁଢ଼ୀକୁ ସାଇକେଲରେ ବସେଇ ଫେରିଲେ ଘରକୁ l ପରାଜୟର ପରସ୍ତେ ଆବରଣ ମୁହଁ ଉପରେ l 

କାଲି ଛାଡି ପହର ଦିନ ରୀନାର ଆଡମିସନ୍ l ଆଜି ରୀନା ଫୋନ କରିଥିଲା ଜେଜେମାଙ୍କୁ l କିଛି ନ ବୁଝି, ଜେଜେମା ରୀନାକୁ କହିଲେ ପହର ଦିନକୁ ପଇସା ନେଇ ଆମେ ଦୁଇଜଣ କଲିକତା ଆସିବୁ l ପନ୍ଦର ଲକ୍ଷ ଟଙ୍କାର ମୂଲ୍ୟ ଜାଣି ନ ଥିବା ବୁଢ଼ୀମାଆଙ୍କ ଆଶ୍ୱାସନାର ମୂଲ୍ୟ ପନ୍ଦର ଲକ୍ଷରୁ ଅଧିକ !! ଦିଲୁ ବୁଢ଼ା କିନ୍ତୁ କଲିଜାକୁ ପଥର କରି ବସି ରହିଛନ୍ତି ଚେୟାର ଉପରେ l ଯେମିତି ବି ହେଉ ଟଙ୍କା ଯୋଗାଡ କରିବାକୁ ହେବ ହିଁ ହେବ l 

****

ହଷ୍ଟେଲ ଗେଟ ପାଖରେ ବୁଢ଼ା ବୁଢ଼ୀ ହାଜର l ଜୀବନର ଅନ୍ୟତମ ଏକ ମାଇଲ ଖୁଣ୍ଟ ପାଖରେ ଆସି ପହଞ୍ଚିଛନ୍ତି ରୁକୁ ବୁଢ଼ୀ l ଆଖିରେ ମେଞ୍ଚାଏ କଳା l ମଥାରେ ଗେଣ୍ଡୁ ଫୁଲ, ମନରେ ଆକାଶ ଛୁଆଁ ସ୍ୱପ୍ନ, ରୀନା ବଡ ଚାକିରୀ କରିବ l ଜୀବନରେ ପ୍ରଥମ ଥର କଲିକତା ଆସିଛନ୍ତି ଦିଲୁ ବୁଢ଼ା ସାଥିରେ l ଖୁସିର ଲହରୀ l ଆଗ ଦାନ୍ତ ନାହିଁ ବୋଲି ଲୁଗା କାନିକୁ ମୁହଁରେ ଜାକି ହସୁଥିଲେ ରୁକୁ ବୁଢ଼ୀ l କେତେ ନିଷ୍କପଟ ସେ ହସ l ସରଳତାର ମହ ମହ ବାସ୍ନା ସେଇ ହସ ଭିତରେ...

ସିକ୍ୟୁରିଟି ଗାର୍ଡ କିନ୍ତୁ ଯିବାକୁ ଦେଲା ନାହିଁ l 

ରୀନା ଆସି ପହଞ୍ଚିଲା ଗେଟ ପାଖରେ l ରୀନାର ଖୁସି କହିଲେ ନ ସରେ l 

ନେ ରିନୁ, ଡିମାଣ୍ଡ ଡ୍ରାଫ୍ଟ ନେଇ ଆସିଛି, ପୂରା ପନ୍ଦର ଲକ୍ଷ, ପେବଲ୍ ଏଟ୍ କଲକତା l ତୋ ନାଁରେ....

ଏତେ ଟଙ୍କା କୋଉଠୁ ଯୋଗାଡ କଲ ଜେଜେ ବାପା !!!

ଘରଟା ବିକି ଦେଲି l 

ଏ କଣ କଲ !!!

ହଁ, ବିକି ଦେଇଛି ....

ଜେଜେ ବାପାଙ୍କୁ କୋଳେଇ ନେଇ କାନ୍ଦିଲା ରୀନା, ରୁକୁ ବୁଢ଼ୀ ପଛକୁ ମୁହଁ ବୁଲେଇ ଧଙ୍କୁ ଥିଲେ..

*****

ହଠାତ ଦିନେ ଖବର କାଗଜରେ ବାହାରିଲା, ଦିଲୁ ବୁଢ଼ା ଉପରେ ସରକାର କୃତଜ୍ଞ ହୋଇ ପ୍ରଧାନମନ୍ତ୍ରୀ ଯୋଜନାରେ ପ୍ରସ୍ତୁତ ହୋଇ ରହିଥିବା ଘରଟିକୁ, ଦାନ ସୂତ୍ରରେ ଦେଇଛନ୍ତି ବୁଢ଼ା ବୁଢ଼ୀଙ୍କୁ...