ତୁମକୁ ପାରୁନି ଭୁଲି

ଶବ୍ଦସବୁ ଖଣ୍ଡିଉଡ଼ା ଦେଲେଣି

ତୁମ ପାଖକୁ ଉଡ଼ିଯିବାକୁ

ଈର୍ଷାର କତୁରୀରେ

କାଳେ କିଏ କାଟିଦେବ ଡେଣା

ସେଥିପାଇଁ ଓଠର ପାଖୁଡ଼ାରେ

ବାଛି ବାଛି ଶବ୍ଦ ସଜାଇ ରଖିଛି

ତୁମପାଇଁ ମାଳଟିଏ ଗୁନ୍ଥିବାକୁ |

ହୃଦୟର ଯନ୍ତ୍ରଣାସବୁ

ଆଷାଢର ନଈ ଭଳି ଫୁଲି ଫୁଲି

ଭାଙ୍ଗିଦିଏ ଛାତିର ବୁରୁଜ

ଯେତେ ବନ୍ଧ ବାନ୍ଧିଲେ ବି 

ମାନେନା, ସେ ଉଜାଣି ଜୁଆର |

ଦେଖାହେଲେ କହିବି

ଇନ୍ଦ୍ରଧନୁରେ ରଙ୍ଗ ଅଛି କେତେ

ଶାଶ୍ୱତ ପ୍ରେମର କେତେ ରଙ୍ଗ,

କହିବି ତୁମକୁ ମଳୟ କାନେ କାନେ

କହେ କେତେ କଥା,

ଜହ୍ନ କାହିଁକି ଖୁଣ୍ଟପୋତି

ଛିଡ଼ାହୁଏ ମଝି ଆକାଶରେ,

ବଗିଚାରେ ମନ୍ଦାର ଫୁଲରୁ

କେମିତି ଲାଲ ରଙ୍ଗ ଝରେ,

ଜଙ୍ଗଲରେ ପଲାଶ ଗଛରେ

କେମିତି ନିଆଁ ଲାଗେ,

ଶବ୍ଦମାନେ ଅମାନିଆ କାହିଁକି

ଖଟ ଖଟ କରିବାକୁ ତୁମ ମନ କବାଟ,

ଆସ ମୁଁ କହିବି

ମୋ ଦେହେ କେତେ ବୋଳା ପ୍ରେମ ରଙ୍ଗ |

ଯୋଜନ ଯୋଜନ ଦୂର

ଆକାଶର ସରହଦ ଡେଇଁ

ତୁମେ ତ ଛୁଇଁଛ ଆକାଶ ନୀଳିମା,

ସେ ନୀଳିମା ଆକାଶରେ

ଜହ୍ନର ପରତ ଥିବ

ତା' ସହ ତାରାଙ୍କ ଭିଡ଼,

ଏଠି କିନ୍ତୁ ତୁମେ ନାହଁ ବୋଲି

ମୋ ଆଖି ଆଗରେ ଝୁଲୁଛି ଅନ୍ଧାର |

ପ୍ରେମଟିକେ ଦେଇଥିଲ ବୋଲି

ପ୍ରତିଧ୍ୱନି କହିଯାଏ ସବୁକିଛି

ଆକାଶର ସମିୟାନା ଚିରି

ତୁମେ ତାକୁ ଶୁଣୁଛ ନା ନାହିଁ, ଜଣାନାହିଁ

ମୁଁ କିନ୍ତୁ ଶୁଣୁଛି ପ୍ରତିଦିନ କାନପାରି |

ଭାବୁଛି ମନଖୋଲି ଲେଖିଦେବି

ତୁମକୁ ଭଲପାଏ ବୋଲି

ତୁମକୁ ମୁଁ ପାରୁନି ଭୁଲି |