ତୁମେ ପା' ଚତୁର ପକ୍ଷୀ

ମାଛ ଧରୁଥିଲା ବଗୁଲୀ ଛୁଆ,

ବରଗଛ ଡାଳୁ ଡାକିଲା କୁଆ-

   'କେତେ ଧରିଲୁଣି କହ',

ବଗୁଲୀ କହିଲା, "ହିସାବ କରି ମୁଁ

କହୁଛି ଟିକିଏ ରହ ।

ପୋଖରୀ ପଙ୍କକୁ ମୁହିଁ ଦରାଣ୍ଡି,

   ପହିଲେ ଧରିଲି ତିନି କରାଣ୍ଡି-

ତା' ପରେ ପୋହଳା ଦୁଇ,

ତୃତୀୟ ଥରକୁ ଚାରିଟା ଚିଙ୍ଗୁଡ଼ି

କୂଳରେ ଦେଲି ମୁଁ ଥୋଇ ।

ଚତୁର୍ଥ ଥରକୁ ଛଅ ଦଣ୍ଡେଇ,

ଝଟଝଟ କରି ଦେଲି ଉଣ୍ଡେଇ-

    ପଞ୍ଚମେ ମାଗୁର ଏକ,

ଛଅ ଥର ବେଳେ ଧଣ୍ଡଟେ ଧରିଲି

ମନରେ ପଶିଲା ଦକ ।

ମାଛ ଧରୁଧରୁ ବହିଲା ଝାଳ,

   ପାଟିରୁ ମୋହର ଗଡ଼ିଲା ଲାଳ-

ଚିଙ୍ଗୁଡ଼ି ଦଣ୍ଡେଇ ଆଣି,

ତରତର କରି ଦୁଇଗଣ୍ଡା ଖାଇ

ପିଇ ଦେଲି ମୁନ୍ଦେ ପାଣି ।

ହଂସରାଡ଼ି ଛୁଆ କାନ୍ଦିଲା ରୁଷି,

କରାଣ୍ଡିଟେ ଦେଲି, ହୋଇଲା ଖୁସି-

      ଆଉତକ ଅଛି ରଖି,

କୁଆ ମଉସା ହେ କେତେ ଅଛି କୁହ

ତୁମେ ପା' ଚତୁର ପକ୍ଷୀ !