ଠିକଣା ଯାଏରେ ହଜି

ନୂଆଖାଇ ପରେ ଗାଁ ରେ ଆମର

   ଘରେ ଘରେ ଝୁଲେ ତାଲା

ଦାଦନ ଯାଆନ୍ତି ଆମ ଗାଁ ଲୋକେ

   ସାଥେ ଧରି ଛୁଆ ପିଲା ।

କୁଆଡେ ଯାଆନ୍ତି କେଉଁଠି ରୁହନ୍ତି

    କେମିତି କାଟନ୍ତି ଦିନ 

ଉତ୍ତର ଦେବାକୁ ନାହିଁ ଜଣେ କେହି

    ପଚାରିଲେ ଏତେ ପ୍ରଶ୍ନ 

ନୂଆଖାଇ ବେଳେ ଗାଁ ରେ ଆମର

   ଦଲାଲ ବୁଲନ୍ତି କେତେ

ଯାଚି ଯାଚି ସିଏ ଟଙ୍କା ବିଞ୍ଚିଥାନ୍ତି

  ଯିଏ ମାଗେ ଯାହା ଯେତେ

ନୂଆଖାଇ ଦିନ ସବୁ ଘରେ ଘରେ

  କେତେ ଖୁସି କେତେ ହସ

ଚିନ୍ତାରେ ଚିନ୍ତାରେ ପିନ୍ଧା ବାସ ତିନ୍ତା

  ପରବ ହୋଇଲେ ଶେଷ

ଦଲାଲ କୁହଇ ଦାଦନକୁ ଗଲେ

   ଅମା ରାତି ଯିବ ପାହି

ମାସ କେଇଟାତ ଖଟିଲେ ସେଇଠି

   ଅଭାବ ରହିବ ନାହିଁ

ଉଜୁଡା ଘରକୁ ସଜାଡିବା ପାଇଁ

    ଆଖିଏ ସପନ ଭରି

ଅଜଣା ରାଇଜେ ଯାଆନ୍ତି ଏମାନେ

    ଦଲାଲ ର ହାତ ଧରି

ସୁଖ ଖୋଜୁ ଖୋଜୁ ଦୁଃଖ ଉବୁଟୁବୁ

    ଲହୁରେ ଯାଆନ୍ତି ଭିଜି

ଫେରିବା ବାଟକୁ ଆଖି ପାଏନାହିଁ

   ଠିକଣା ଯାଏରେ ହଜି