ତାଜା ଖବର

କେତେ ପାଠପଢି ଆଇ ଏଫ ଏସ ପାଇଛି ମୁଁ ବୁଦ୍ଧିବଳେ,

ଜଙ୍ଗଲ ସୁରକ୍ଷା ଦାୟିତ୍ୱ ନେଇଛି ଦରମା ପାଉଛି ପୁଳେ ।

ଚେହେରା ପାଇଛି ରଜାପୁଆ ପରି ଦେଖ ମୋର ଠାଣି-ମାଣି,

ଓଡ଼ିଶା ଜଙ୍ଗଲ ରାଜା ମୁଁ ହେଇଛି ମନ୍ତ୍ରୀଙ୍କୁ ପେଉଛି ପାଣି ।

ଗଢ଼ିଛି ପ୍ରାସାଦ ଦେଖିଲେ ଡରିବ ସମ୍ରାଟ ଶାହାଜାହାନ,

ଆକାଶରେ ଉଡ଼େ ରାବଣ ପରାଏ ଧରି ପୁଷ୍ପକ ବିମାନ ।

କୁଳାଙ୍ଗାର ବୋଲି କହିବି କେମିତି ମୋ ପୁଅର ବୁଦ୍ଧି ଦେଖି,

ଟାଟା କମ୍ପାନୀର ସର୍ବେସର୍ବା କହି ଚାକରି ଦେଉଛି ଡାକି ।

ପାଣିଗ୍ରାହୀ ଝିଅ ମନ ମୋହିନେଲା କୋଟି କୋଟି ଖର୍ଚ୍ଚକରି,

ଯୋଗ୍ୟତମ ପୁତ୍ର ଆକାଶ ବୁଲୁଛି ପ୍ରେମିକାଙ୍କୁ ସାଥେ ଧରି ।

ସାରା ରାଇଜର ସୁଖ ମାନ ଜ୍ଞାନ ବୁଦ୍ଧି ବଳ କଉଶଳ,

ସବୁ ଲାଞ୍ଚ-ମିଛ ଚୋର ଠକଧନ ମୋ ଘରେ ହୋଇଛି ଠୁଳ ।

ଜଙ୍ଗଲର ସିଂହ ଅଜଗର ସାପ ଆମକୁ ହେବେନି ସରି,

ସର୍ବଗ୍ରାସୀ ଆମେ ଆମ ଗିଳା ଦେଖି ତିମିମାଛ ଯିବ ଡରି ।

ମୋ ଭଳି ଆହୁରି କେତେ ଲୁଟୁଛନ୍ତି ରାଇଜକୁ ଖୋଳକରି,

ଓଡ଼ିଶାକୁ ଆମେ ଗରିବ ରଖିବୁ ରହିଥିଲା ଯେଉଁପରି ।