ସୁନ୍ଦରୀ ଝିଅ ଦିଶେ ଆହୁରି ସୁନ୍ଦର

    ବଉଦ ଭାସିଲେ ନୀଳ ଆକାଶରେ

        ରଙ୍ଗ ତାର ନୂଆ ଦିଶେ

    ଚଉଦ ପୁରିଲେ ସୁନ୍ଦରୀ ଝିଅଟି

       ଆହୁରି ସୁନ୍ଦର ଦିଶେ ।

   ପନ୍ଦର ପୁରିଲେ  ଖୋଜେ ତା ନଜର

      ନିଜର ନିଜର କେହି

  ଯେମିତି ଜହ୍ନର ଯୋଛନାକୁ ସତେ

     ଖୋଜୁଥାଏ ନୀଳ କଇଁ     

  ଷୋହଳ ପଶିଲେ  ଷୋଳ ବୟସୀ ସେ

     ମହମହ ହୋଇ ବାସେ

     ରଙ୍ଗ ତାର ନୂଆ ଦିଶେ ।

  ସତର ପୁରିଲେ  ହଜାରେ ସପନ

     ମନ କରେ ତାର ଚୋରି

  ଉଛୁଳି ପଡଇ  ରୂପ ଯଉବନ

     ଦେହ ଲାଗେ ଭାରି ଭାରି

  ଅଠର ପୁରିଲେ  ଡେଣା ଝାଡି ମନ

     ଅଜଣା ରାଇଜେ ଭାସେ

    ରଙ୍ଗ ତାର ନୂଆ ଦିଶେ ।

   ଉଣେଇଶ ଯେବେ ପୂରିଯାଏ ଝିଅ

      ଉଣା କରୁଥାଏ ମନ

  କୋଡିଏ ପୂରିଲେ ଅଲିଅଳୀ ଜେମା

      ଗଣୁଥାଏ ବସି ଦିନ

  କିଏ ରାଜାପୁଅ ରୋଷଣୀ କରିଲୋ

       ନେବ ତାକୁ ପରଦେଶେ..

      ରଙ୍ଗ ତାର ନୂଆ ଦିଶେ ।