ସନ୍ତୁଳିତ ଜୀବନ

ଆସିଅଛି ଏ ଧରାକୁ ପ୍ରଭୁ ହେ ତୁମ ଇଛା ଅନୁଯାୟୀ

ଫେରିଯିବି ଖେଳସାରି ତୁମକୁ ମୁଁ କିଛି କହି |

ଯାହା କହିବାକୁ ଚାହେଁ ଶୁଣିବ କି କାନ ଡେରି

ନ ଶୁଣିଲେ ରହିଯିବି ମୋ କର୍ମକୁ ନିନ୍ଦା କରି |

ଭୂମିଷ୍ଠ ପରଠୁ ପ୍ରଭୁ ଗାଇଲି ତୁମରି ଗୀତ

ମୋ ମନ ସରଶିତ, ଦେଖିନି ମୋ ଭବିଷ୍ୟତ |

ଏ ଭବ ଅତିଥିଶାଳେ ମୁଁ ସିନା ଅତିଥି ଟିଏ

ଗାଇଯିବି ପ୍ରେମଗୀତି ଜନ୍ମରୁ ମରଣ ଯାଏଁ |

ମୋ କୋଷ୍ଠି ରେ ଯାହା ଲେଖା ଦେଖାଇବି ମୁଁ କାହାକୁ

ମୋ ଜୀବନ ଜାତକ ଟା ଅର୍ପିତ ଚଉବାହା କୁ |

ଏ ବିଶ୍ୱ ବ୍ରହ୍ମାଣ୍ଡେ ପ୍ରଭୁ ବିସ୍ତାରିତ ତୁମ କାୟା

ସୃଜିଛ ସ୍ୱାମୀ ସନ୍ତାନ ସବୁଥିରେ ଭରି ମାୟା |

ଯାହା ଦେଲ ମୋ ଭଲପାଇଁ ସବୁ କୁ ଆପଣେଇଲି

ଜାଣୁ କି ନ ଜାଣୁ କିଏ ତୁମ ସତ୍ତା ପାଇଗଲି |

ତୁମେ ମୋର ଗତିଦାତା ଦେଲ ମୋତେ ଦିବ୍ୟଜ୍ଞାନ

ମୁଁ ଅନୁସରେ ସେହିପଥ ରଖ ହେ ବିଶ୍ୱକାରଣ |

ତୁମରି କୃପାରୁ ପ୍ରଭୁ ଦେଖିଲି ସାରା ସଂସାର

ସଭିଏଁ ମୋ ଆପଣାର କେହିବି ନୁହଁନ୍ତି ପର |

ହଜିଗଲି ମୁଁ ମୋହରେ ପାପପୁଣ୍ୟ ଦୋଛକି ରେ

ଆଜି ଖୋଜେ ମୁକ୍ତିପଥ ଦେଖା ପ୍ରଭୁ ମୋତେ ବାରେ |

ତୁମେ ଦିବ୍ୟ ଚେତନା ହେ ତୁମେ ମୋ ମୁକ୍ତିକାରଣ

ତୁମ ବିନା ପୂଜାତୀର୍ଥ ମୋ ପାଇଁକି ଅକାରଣ |

ତୁମେ ମୋ ଜୀବନ ଫଲଗୁ ମଳୟ ରେ ଝରିଆସ

ତୁମେ ହିଁ ମୋ ରକ୍ଷାକବଚ ଆଉ ମୋ ଶେଷ ବିଶ୍ୱାସ |

ତୁମେ ସତ୍ୟ, ଦୟା, କ୍ଷମା ତୁମେ ହିଁ ଧର୍ମ ନିକିତି

ଯୁଗେ ଯୁଗେ ଅବତରି ଉଡାଇଛ ନିଜ କୀର୍ତ୍ତି |

ତୁମେ ତ ଶରଣ ମୋର ଝରାଇ କରୁଣାଝର

ଶରଣାଗତ ଉଦ୍ଧାରି ରଖ ତୁମ ବଡ଼ପଣ |

ଆଉ କିସ ଜଣାଇବି ସନ୍ତୁଳିତ ଏ ଜୀବନ

ଦିନୁ ଦିନ ଦୁଃଖ ମୋର ଆସୁଛି ହୋଇ ଦ୍ବିଗୁଣ |

ତୁମବିନା ଦୁଃଖକିଏ ଫେଡ଼ିବ ହେ ଦୁଃଖହାରୀ

ତୁମେ ମୋ ଶେଷ ଭରସା ହାତ ଧରି କର ପାରି ।