ସଂଘର୍ଷ
ସଂଘର୍ଷ
ମାଟି ବିଦାରି ଅଙ୍କୁରି ଉଠୁଥିବା ଚାରା ଗଛଟିଏ
ଅବା ମହାଦ୍ରୁମର ଲମ୍ଵି ଯାଇଥିବା ଚେର ସବୁ
ପ୍ରତି ମୁହୂର୍ତ୍ତରେ କରି ଚାଲିଥାନ୍ତି ସଂଘର୍ଷ
କଅଁଳୁଥିବା ପତ୍ରଠୁ ମେଲୁଥିଲା ଶାଖା ପ୍ରଶାଖା
ବଢ଼ିବା ପାଇଁ ଫୁଲ ଫଳ ଦେବା ପାଇଁ ହିଁ
ଥା'ନ୍ତି ପ୍ରକୃତି କୋଳରେ ପ୍ରତିକୂଳକୁ ସାମ୍ନା କରି
ସୂର୍ଯ୍ୟର ଉଦୟରେ ଆସେ ଆଲୋକ
ଅସ୍ତ ହେଲା ପରେ ଘୋଟିଯାଏ ଘନ ଅନ୍ଧାର
ଆଲୋକ ଅନ୍ଧାରର ଚାଲିଥାଏ ସଂଘର୍ଷ
ଓଠରେ ଫୁଟାଇବାକୁ ମନ ଖୋଲା ମିଠା ହସ
ଝରି ଯାଉଥିବା ଆଖିର ଲୁହକୁ ପୋଛିବା ପାଇଁ
ପେଟର କ୍ଷୁଧା ମନର ଆଶା ଅଭିଳାଷ
ସବୁ କିଛିର ସଫଳତା ପାଇଁ ଚାଲିଛି ସଂଘର୍ଷ
ବଣ ଜଙ୍ଗଲର ଆଦିମ ଅଧିବାସୀଙ୍କଠାରୁ
ଏ ଯାଏଁ ଆଗକୁ ଆଗେଇ ଆସିଥିବା ସଭ୍ୟ ଶିକ୍ଷିତ
ଜାରି ରଖିଛି ସେଇ ସଂଘର୍ଷର ଧାରା କ୍ରମଶଃ
ଦୁନିଆଁରେ ବଞ୍ଚି ରହିବାକୁ ସମସ୍ତଙ୍କର ଇଚ୍ଛା ଆଶା
ଜିତୁ ଜିତୁ ହାରେ ପୁଣି ହାରି ଯାଇ ଜିତେ
ଉତ୍ଥାନ ପତନରେ ପ୍ରବାହିତ ହୁଏ ଜୀବନଧାରା
ସଂଘର୍ଷ ବିନା କ୍ଷଣେ ବଞ୍ଚି ରହିବାର ନାହିଁ ସମ୍ଭାବନା
ଜୀବନର ପ୍ରତି ପାଦରେ ଅଜଣା ଆତଙ୍କର ଭୟ
ଘଣ୍ଟାର ପ୍ରତିଟି ଟିକ୍ ଟିକ୍ ଶବ୍ଦ ଲାଗେ ଘଡ଼ିସନ୍ଧି
ସେଇ ଅଦେଖା ଭବିଷ୍ୟତକୁ ସ୍ଵାଗତ କରିବା ପାଇଁ
ଅନ୍ଧାର ଭିତରେ ଆଲୋକ ଖୋଜିବା ତ
ବର୍ତ୍ତମାନର ଜୀବନ ଆସନ୍ତାକାଲିର ନୂଆ ସକାଳ
ସବୁଠି ସବୁବେଳେ ଚାଲିଛି ଚାଲିଥିବ ସଂଘର୍ଷ।