ସମ୍ପର୍କ ହୃଦୟର

ନିଘୋଡ ନିଦରେ ଶୋଇଥିଲା କୁମୁଦ 

ଜ୍ୟୋଛନା ବିଧୁରିତ କାକର ବିନ୍ଦୁ 

ଶୁଭ୍ରରଙ୍ଗ ପରିହିତା ରଜନୀ 

ହଠାତ୍ କୁମୁଦ ଶରୀରରେ କେମିତି 

ଏକ ଅଜବ ଶିହରଣ 

ନୂତନ ଅନୁଭବ 

ଧିରେ ଧିରେ ଆଖି ଖୋଲି ଚାହିଁଲା 

ଖିଲି ଖିଲି ହସୁଥିଲା ଆକାଶେ ଚନ୍ଦ୍ରମା 

ତା'ର ଶୀତଳ ଜ୍ୟୋଛନା ଢାଳି 

କୁମୁଦକୁ ଦେଇ ଚାଲିଥିଲା ଅଜସ୍ର ଚୁମା

କୁମୁଦ ମନରେ ପ୍ରଶ୍ନ ଖାଲି ପ୍ରଶ୍ନ

କିଏ ଗୋ ତୁମେ?

ଜଗାଇଲ ମୋର ସୁପ୍ତ ଚେତନା 

ତୁମକୁ ଦେଖିଲେ ମୁଁ ଭୁଲିଯାଏ ମୋତେ 

ଦୂରହୋଇଯାଏ ସବୁ ବେଦନା 

ଆଉ ଦେହରେ ମୋର

ଇୟେ କି ହୁଏ ?

ମୁଁ ହଜିଯାଏ କାହିଁ ତୁମକୁ ଦେଖି

ପାରେନା ରୋକି

ମୁଁ ଖୋଜୁଥାଏ ମୋର ଅସ୍ତିତ୍ତ୍ୱ

ହସୁଥାଅ ତୁମେ ଅମ୍ବରେ ରହି

ନିରବରେ କୁହ ସତେକି ମୋତେ 

ମୁଁ ପରା ତୁମର

ତୁମେ ତ ମୋହର 

ବନ୍ଧନ ଆମର ଚିର ଅମର 

କେହି ବି ଆମକୁ ରୋକି ପାରିବେନି 

ସଖୀରେ, ଭଲପାଇବା ମୋର 

ନୁହେଁ କ୍ଷଣିକ 

ତୁମରି ପାଇଁ ଜ୍ୟୋଛନା ଢାଳୁଥିବି 

ତୁମରି ହସରେ ମୁଁ ହସୁଥିବି 

ଥିବାଯାଏ ମୋର ଶେଷ ନିଃଶ୍ୱାସ ।