ସକାଳୁ ସକାଳୁ

ସକାଳୁ ଉଠିକି ମୋବାଇଲ ପାଖେ

ହାତ ମୁଁ ମାରିଲି ଯେବେ

ନ ପାଇକି ମୁହିଁ ତାହାକୁ ପାଖରେ

ଚିନ୍ତାରେ ପଡ଼ିଲି ତେବେ ।

       

 ପଡ଼ିଯିବ ଯଦି ମୋ ଘରଣୀ ହାତେ

 ଖୋଲିବ ଗୁମର ମୋର

 ସକାଳୁ ସକାଳୁ ଆଜି ପିଟାହେବ

 ଫାଟିବ ଯେ ପିଠି ମୋର ।

        

ଘରଣୀ ମୋହର ଭାରି ସନ୍ଦେହୀ ଟେ

 ଚାହାଣୀ ସନ୍ଦେହ ଭରା

 କେଉଁ ଝିଅ ପିଲା ନମ୍ବର ଦେଖିଲେ 

 ଉଠେଇ ଦେବ ମୋ ଥରା ।

ସନ୍ଧାନୀ କୁକୁର ନାକ ଯେ ତାହାର

ଖସିବାର ବାଟ ନାହିଁ

ସକାଳୁ ସକାଳୁ ଜୀବନ ଟା ମୋର

ବୃଥାରେ ଯିବ ପଳାଇ ।

ସେଜରୁ ଉଠିକି ଧିରେଧିରେ ଗଲି

ଘରଣୀ ପାଖକୁ ମୋର

ଅତି ଯତନରେ ପଚାରିଲି ଧନ

ମୋବାଇଲ କାହିଁ ମୋର ।

ରାଗ ତମ ତମ ହୋଇ ଯେ ଘରଣୀ

କହିଲେ ଚିଲେଇ ମତେ

ବେଲେଣା ଛାଞ୍ଚୁଣି ତୁମକୁ ଲୋଡାହେ

ପାଗଳ ହେଲଣି ସତେ ।

ଘରଣୀ ଙ୍କ ମୁଖ ଏକଥା କୁ ଶୁଣି

ବଢ଼ିଗଲା ମୋର ଚିନ୍ତା

ମନେ ମନେ କେତେ ପ୍ରାର୍ଥନା କରିଲି

ବଞ୍ଚାଇ ଦିଅ ଦେବତା ।

ପୁନଶ୍ଚ ଚିଲେଇ ଘରଣୀ କହିଲେ

ମସ୍ତିଷ୍କ କି ଭ୍ରମ ହେଲା 

ମୋବାଇଲ ନେଇ ଦୋକାନରେ ଦେଇ

ଏଠି କରୁଅଛ ହାଲା ।

ଘରଣୀ ଙ୍କ କଥା ଶୁଣି ଏହି କର୍ଣ୍ଣ 

ଦୂର ହୋଇଗଲା ଚିନ୍ତା

ମୋବାଇଲ ପାଇଁ ସତରେ ଆଜି ମୋ

ପ୍ରାଣ ଟା ବି ଯାଇଥାନ୍ତା ।