ଶ୍ରମିକ ଭାଇ
ଶ୍ରମିକ ଭାଇ
ଶ୍ରମିକ ଭାଇରେ ଶ୍ରମିକ ଭାଇ l
ଶ୍ରମ କରି ଯାଉ କହ କିମ୍ପାଇଁ ll
ଶ୍ରମ କରିବା ମୋ ମହାନ ତପ l
ବିନାଶ୍ରମେ ଖାଦ୍ୟ ବିସ୍ତର ପାପ ll
ଶ୍ରମ କରି କର ଜୀବନ ଧନ୍ୟ l
ପରୋପକାର ଏ ପରମ ଧର୍ମ ll
ମନେ ରଖିଥାଅ ଗୀତାର ଭାଷା l
କର୍ମ କରିଯାଅ ଫଳେ ନ ଆଶା ll
କଳ ନଦୀ ବନ୍ଧ ସହର କୋଠା l
ଶ୍ରମରେ ସମ୍ଭବ ମନେ ରଖି ଥା ll
ଶ୍ରମବଳେ ଚାଲେ ମଟର ଗାଡ଼ି l
ଅନ୍ୟଗ୍ରହ ଲୋକ ଯାଆନ୍ତି ଉଡ଼ି ll
ଶ୍ରମବଳେ ଖୋଳା ରତନ ଖଣି l
ଶ୍ରମ ବଳେ ବନ୍ଧା ସ୍ୱର୍ଗ ନିଶୁଣି ll
ଉତ୍କଳ ଉତ୍କଳ ମଣି ଗୌରବ l
କହିଥିଲେ ଏକ ବାଣୀ ଅପୂର୍ଵ ll
ମଣିଷ ଜନମ ନୁହେଁ ଗଣନା l
ଵର୍ଷ ମାସ ଦିନ ଦଣ୍ଡରେ ସିନା ll
କରମେ ଜୀବନ କର୍ମେ ମରଣ l
ମାନ ଦଣ୍ଡ ଏହା ମଣିଷ ପଣ ll
ବୁଝି ଗଲି ଏବେ ଶ୍ରମିକ ଭାଇ l
ଦେଶର ଉନ୍ନତି ତୋହରି ପାଇଁ ll
ଶ୍ରମିକ ଭାଇରେ ତୁ ଲାଗି ପଡ଼ l
ଶ୍ରମ ଠାରୁ କିଛି ନାହିଁଟି ବଡ଼ ll
ଶିରାଳ ହାତେ ତୋ ମିଳାଇ ହାତ l
ମିଶି ଗଢ଼ି ଯିବା ସୁନା ଭାରତ ll