ଶ୍ରୀରାମ ଜନ୍ମ ବୃତ୍ତାନ୍ତ
ଶ୍ରୀରାମ ଜନ୍ମ ବୃତ୍ତାନ୍ତ
(ରାଗ :- ଗୁଜ୍ଜରୀ / ଭାଗବତ ବାଣୀ)
ବିଶ୍ୱପ୍ରସିଦ୍ଧ ରଘୁବଂଶ l ଅବଧ ନଗରର ଈଶ ll
ରଘୁବଂଶରେ ଦଶରଥ l ଜନ୍ମିଲେ ତ୍ରେତା ଯୁଗ ଅନ୍ତ ll
ଅଜଙ୍କ ପୁତ୍ର ସେହୁ ଜାଣ l ବଢିଲେ ପୂର୍ଣ୍ଣ ଇନ୍ଦୁ ସମ ll
ମାତା ଇନ୍ଦୁମତୀ ସ୍ନେହରେ l ବାଳରୁ ସେହୁ ଯୁବାହେଲେ ll
ବିଭା ବୟସ ଉପନୀତ l ବିବାହ କୌଶଲ୍ୟା ସହିତ ll
କେକୟ ନନ୍ଦିନୀ କୈକେଇ l ସୁମିତ୍ରା ଆଦି ତିନି ଦେଈ ll
ଏମନ୍ତ ସମୟେ ରାବଣ l ବଳେ ଜିଣିଲା ତ୍ରିଭୁବନ ll
ଅଯୋଧ୍ୟା ଦେଶକୁ ବିଜୟ l କରିବ ମନେ କଲା ଥୟ ll
ଘୋର ସମରେ ଦଶରଥ l ରାବଣେ କରିଲେ ପରାସ୍ତ ll
ବନ୍ଧନ କଲେ ତାକୁ ଯେଣୁ l କାକୁସ୍ତ ଭାବ ଘେନି ତେଣୁ ll
ମାଗିଲା ରଖହେ ଜୀବନ l ତା ଦେଖି ରାଜା ହୃଷ୍ଟମନ ll
ଶରଣାଗତକୁ ରଖନ୍ତି l ରଘୁବଂଶର ଏହି ନୀତି ll
ବୋଇଲେ ମାଗି ଘେନ ବର l କରୁଛି ସତ୍ୟ ତିନିବାର ll
ରାବଣ ଜାଣେ ସିଦ୍ଧି ବଳେ l ୟା ପୁତ୍ର ମାରିବେଟି ବେଳେ ll
ଏଣୁ ଶପଥ କରାଇବି l ସନ୍ତାନ ନହେଉ ମାଗିବି ll
ମାଗିଲା ଯହୁଁ ଏହି ବର l ଚିନ୍ତିତ ଦଶରଥ ବୀର ll
ରଘୁକୁଳର ରୀତି ଅଛି l ବଚନ ନଯିବେ ମୁରୁଛି ll
ଅସ୍ତୁ ବୋଲିଣ ପୁଛାକଲେ l ଏହା ସମ୍ଭବ କେହ୍ନେ ଭଲେ ll
କୌଣପ ବୋଲଇ ବଚନ l ସ୍ତ୍ରୀ ଋତୁମତି ସପ୍ତଦିନ ll
ତା ପର ନବ ଦିନ ଯାଏ l ଗର୍ଭ ସମ୍ଭବ ଯେଣୁ ହୁଏ ll
ଷୋଡଶ ଦିବସ ପର୍ଯ୍ୟନ୍ତ l ନଯିବ ସହବାସ ପଥ ll
ସନ୍ତାନ ନହେବ ଉତ୍ପନ୍ନ l ରହିବ ମୋହର ଜୀବନ ll
ହେଉ ବୋଇଲେ ଦଶରଥ l ଯେଣୁ ସେ ମହା ସତ୍ୟବ୍ରତ ll
ସେଦିନୁ ସନ୍ତାପରେ ଥାଇ l ମୃଗୟା ପାଇଁ ବନେ ଯାଇ ll
ଅଜ୍ଞାତେ ଶବ୍ଦଭେଦି ମାରି l ଶ୍ରବଣ ଜୀବନ ସଙ୍ଘାରୀ ll
ଅନ୍ଧମୁନିଙ୍କ ଶାପ ଘେନି l ନବରେ ରହିଲେ ସେ ତୁନି ll
ମୁଖ ନଦେଖି ପୁତ୍ରଙ୍କର l ମୃତ୍ୟୁ ତୋ ହେଉରେ ପାମର ll
ଏମନ୍ତେ ଗଲା କିଛି ଦିନ l ଗୁରୁଙ୍କୁ ମିଳିଲେ ରାଜନ ll
ସମସ୍ତ ବୃତ୍ତାନ୍ତ ଭଣିଲେ l ଶୁଣି ଗୁରୁ ଯେ ଆଜ୍ଞାଦେଲେ ll
ପୁତ୍ରେଷ୍ଟି ଯଜ୍ଞ କର ରାଜା l ନିଶ୍ଚୟ ଜନମିବେ ପ୍ରଜା ll
ଋଷ୍ୟଶୃଙ୍ଗ ସେ ବ୍ରହ୍ମଋଷି l ଯଜ୍ଞ କରନ୍ତୁ ଏଠି ଆସି ll
ନିମନ୍ତ୍ରୀ ଋଷ୍ୟଶୃଙ୍ଗ ମୁନୀ l ଯଜ୍ଞ ଆରମ୍ଭ କଲେ ପୁଣି ll
ପୁତ୍ରେଷ୍ଟି ଯଜ୍ଞ ପୁରୋହିତ l ହୋଇଣ ଥିବେ ବିବାହିତ ll
ଋଷ୍ୟ ଯେଣୁ ଅବିବାହିତ l ଏ ଯଜ୍ଞ ନୁହଁଇ ବିହିତ ll
ଶୂନ୍ୟରୁ ଏହି ବାଣୀ ଶୁଣି l ପଡିଲା ଯେ ମହା ଭାଳେଣି ll
କନ୍ୟାଏ କେଉଁଠୁ ଆଣିବେ l ଋଷ୍ୟଶୃଙ୍ଗଙ୍କୁ ବିଭା ଦେବେ ll
ସେ ମହାରାଜ ଲୋମପାଦ l ଯଜ୍ଞ ସ୍ଥଳରେ ସ୍ଥାପି ପାଦ ll
ବିନମ୍ର ଭାବରେ ବୋଇଲେ l ଶାନ୍ତା କନ୍ୟାକୁ ବିଭାଦେଲେ ll
କେମନ୍ତ ହୋଇବ ପ୍ରସ୍ତାବ l ରାଜନ ମନରେ ହେଜିବ ll
ଦଶରଥ କଲେ ସ୍ମରଣ l ପୂର୍ବେ ମୃଗୟା ଗଲି ବନ ll
ସୁନ୍ଦରୀ ମାନ୍ଦାକ୍ଷାତା ସହ l ବନେ ମିଳିଲି ହୋଇ ମୋହ ll
ବୃହଦ୍ରଥ ସ୍ତ୍ରୀ ମାନ୍ଦାକ୍ଷାତା l ଶବରୀ ଗରଭୁ ଶମ୍ଭୁତା ll
ଶାନ୍ତା ଯେ ମୋର ନିଜ ସୂତା l ଲୋମପାଦ ରାଜ ପାଳିତା ll
ଅସ୍ତୁ କରନ୍ତେ ସେ ରାଜନ l ଋଷ୍ୟଙ୍କୁ କନ୍ୟା କଲେ ଦାନ ll
ପୁତ୍ରେଷ୍ଟି ଯଜ୍ଞ ସମାପନ l କରିଲେ ଅଥର୍ବ ବ୍ରାହ୍ମଣ ll
ଅଥର୍ବବେଦୀ ଋଷ୍ୟଶୃଙ୍ଗ l ଆୟୁର୍ବେଦରେ ସେଯେ ତୁଙ୍ଗ ll
ସମସ୍ତ ଔଷଧୀ ଜାଣନ୍ତି l ଗର୍ଭ କେମନ୍ତେ ପ୍ରସରନ୍ତି ll
ଏପରି ବନୌଷଧି ଆଣି l ଚରୁ ରାନ୍ଧିଲେ ଋଷିମଣି ll
ସେ ଚରୁ ଯେ ଗର୍ଭକୁ ଗଲା l ଗର୍ଭ ଧାରଣ ବୃଦ୍ଧି ହେଲା ll
ଷୋଡଶ ଦିବସ ପର୍ଯ୍ୟନ୍ତ l ରାବଣ ବର ନେଲା ସତ୍ୟ ll
ତାପରେ ଗର୍ଭ ନ ସଞ୍ଚରେ l ତାହା ସମ୍ଭବ ଏ ଚରୁରେ ll
ଏମନ୍ତେ ତିନି ରାଣୀ ମିଳି l ଆନନ୍ଦେ ଚରୁ ଦେଲେ ଗିଳି ll
ଔଷଧୀ ଗୁଣ ଥିବା ସତ୍ୱେ l ଷୋଡଶ ଦିନାନ୍ତର ଗତେ ll
ଗର୍ଭ ରହିଲା ରାଣୀଙ୍କର l ଜନ୍ମିଲେ ସୁନ୍ଦର କୁମର ll
ମର୍ଯ୍ୟାଦା ପୁରୁଷ ଉତ୍ତମ l ରାଜୀବ ଲୋଚନ ଶ୍ରୀରାମ ll
ଚତୁର୍ଦ୍ଧା ମୂରତି ହୋଇଲେ l ଭରତ ଲକ୍ଷ୍ମଣଙ୍କ ତୁଲେ ll
ଶତ୍ରୁଘ୍ନ ପୁଣି ଉପୁଜିଲେ l ଅବଧେ ଜନମ ଲଭିଲେ ll
ସେ ରାମ ପଦପଙ୍କଜରେ l ମନ ମୋ ରହୁ ନିରନ୍ତରେ ll
ମନ ମୋ ନିରନ୍ତରେ ରହୁ l ହା ରାମ ବୋଲି ଜୀବଯାଉ ll
ହା ରାମ ବୋଲି ଯାଉ ଜୀବ l ମୋତେ ଉଦ୍ଧର ସୀତାଧବ ll
ମୋତେ ଉଦ୍ଧର ପଦ୍ମନାଭ l ମୋତେ ଉଦ୍ଧର ବିଶ୍ୱଦେବ ll
ଜୟତୁ ଜୟ ରାମଚନ୍ଦ୍ର l ସକଳ ଦେବଙ୍କର ଇନ୍ଦ୍ର ll
ନୀଳମ୍ବୁ ତନୁ ତୋ ସୁନ୍ଦର l କୋଟି କନ୍ଦର୍ପ ମନୋହର ll
ଅଭୟ ଚରଣେ ଅଭୟ l ଶରଣ ଗଲି ହେ ନିର୍ଭୟ ll