ସ୍ବତନ୍ତ୍ର ଓଡିଶା ଓ ବାପୁଜୀ
ସ୍ବତନ୍ତ୍ର ଓଡିଶା ଓ ବାପୁଜୀ
ଗଙ୍ଗା କୂଳଠାରୁ ଗୋଦାବରୀ
ଲମ୍ବିଥିଲା ଯେଉଁ ରାଇଜ ଦିନେ
ସେହି ରାଇଜର ଶିରି ତୁଟିଗଲା
ପାଦଦେଲେ ଯେବେ ଇଂରେଜ ମାନେ ।
ଗୋରା ସରକାର ଓଡିଶା କୁ ଆସି
କଳେବର ତାର ବିଦାରି ଦେଲେ
ଖଣ୍ଡଖଣ୍ଡ କରି ବଙ୍ଗଳା , ବିହାର,
ମାନ୍ଦ୍ରାଜ ସାଥିରେ ମିଶାଇ ଦେଲେ ।
ଭାଷା ଥିଲା ଆମ ,ଭାବ ଆବେଗକୁ
ବୁଝିବା ପାଇଁକି ନଥିଲେ କେହି
ହଜି ଯାଇଥିଲା ପରିଚୟ ଆମ
ସାକ୍ଷୀ ଥିଲା ସେହି ସମୟ ନଈ ।
ଭାରତ ମାତା ର ମୁକତି ପାଇଁକି
ଆରମ୍ଭ ହୋଇଲା ଯେବେ ଲଢେଇ
ଉତ୍କଳ ଜନନୀ ଲୁହ ପୋଛିବାକୁ
କିଏବା କାହିଁକି ଆସିବ ଧାଇଁ !
ସ୍ବତନ୍ତ୍ର ଉତ୍କଳ ଗଠନ ନିମନ୍ତେ
ମଧୁ ବାବୁ ଆମ ଭିଡିଲେ ଅଣ୍ଟା
ଓଡିଶା କୁ ଆସି ବାପୁଜୀ ମହାତ୍ମା
ସହଯୋଗ ପାଇଁ ଦେଲେତ କଥା ।
ସାରା ଦେଶ କଥା ଭାବୁ ଭାବୁ ବାପୁ
ଓଡ଼ିଆ ଙ୍କ ଦୁଃଖ ବିଚାର କଲେ
ଓଡିଶା ପ୍ରଦେଶ ଗଠନ ଦିଗରେ
ମନୋବଳ ଆମ ବଢାଇ ଦେଲେ ।
"ଭାଷା ଭିତ୍ତିରେ ତ ରାଜ୍ୟ ହେଲେ ଗଢା
ଶାସନ, ବିଚାର, ସହଜ ହେବ"
କଙ୍ଗ୍ରେସ ସଭାରେ ଏହି କଥାଟିକୁ
ମହାତ୍ମାଗାନ୍ଧୀ ତ କଲେ ପ୍ରସଙ୍ଗ।
ପ୍ରସଙ୍ଗ ହୋଇଲା ସଭାରେ ବିଚାର
କଥାଟି ସଭିଙ୍କ ମନକୁ ଗଲା
ଭାଷା ଭିତ୍ତିରେ ତ ସ୍ଵତନ୍ତ୍ର ଓଡ଼ିଶା
ଗଠନ ପାଇଁକି ବାଟ ଖୋଲିଲା ।
ଭାରତ ଶାସନ ସଂସ୍କାର ପାଇଁକି
ଲଣ୍ଡନରେ ଯେବେ ବୈଠକ ହେଲା
ସେ ଆଲୋଚନାରେ ଗାନ୍ଧିଜୀଙ୍କ ଯୋଗୁ
ଓଡ଼ିଶାର କଥା ସ୍ଥାନ ପାଇଲା ।
ଭାଷାର ମହତ୍ତ୍ଵ ଅନୁଭବ କରି
ଗୋରା ସରକାର ନେଲେ ଯତନ
ଓଡ଼ିଆ ଅଞ୍ଚଳ ମିଶାଇ ଏକାଠି
ଓଡିଶା ପ୍ରଦେଶ ହେଲା ଗଠନ ।
ବାପୁଜୀଙ୍କ ଏହି ସ୍ନେହ ଶରଧା କୁ
ଓଡ଼ିଆ କି କୁହ ପାରିବ ଭୁଲି
ତାଙ୍କପାଇଁ ଆମେ "ପରିଚୟ" ପାଇ
ଗରବ କରୁଛୁ ଓଡ଼ିଆ ବୋଲି ।
ତଥ୍ୟ- ଓଡିଶା ରିଭ୍ୟୁ ର ୨୦୦୮ ମସିହା
ଜାନୁଆରୀ ସ°ଖ୍ୟାରେ ପ୍ରକାଶିତ
ଡ.(ଶ୍ରୀମତି) ବି.କେ.ଶର୍ମା ଙ୍କ ପ୍ରବନ୍ଧ