ରଜ(ଭାଗ-୨)

ମଥାରେ ସାଜିବ କୁଙ୍କୁମର ଚିତା

  ହାତରେ ରଙ୍ଗୀନ ଚୁଡ଼ି।

ଅଧରେ ନାଲିମା, ସୁନେଲି ଟିକିଲି

  ବେଣୀରେ ରିବନ ଭିଡି।-୧

ନୂଆ ବୋହୁ ଙ୍କର ମନ ପ୍ରଫୁଲ୍ଲିତ

  ଆସିଲେ ରଜ ପରବ।

ରଜ ଭାର ଧରି ଭାଈ ଯେ' ଆସିବ

  ତାଙ୍କର କେତେ ଗରବ।-୨

ଗାଆଁରୁ ସହର ପରବ ମଉଜ

  ମନରେ ଆନନ୍ଦ ଦିଏ।

ସଜ ବାଜ ହୋଇ ସର୍ବେ ବୁଲୁଥାନ୍ତି

  କର୍ମର ଚିନ୍ତା ନ' ଥାଏ।-୩

ଧନୀ ଓ' ଦରିଦ୍ର ସଭିଏଁ ପାଳନ୍ତି

  ଉତ୍କଳର ଏହି ପର୍ବ।

ଖେଳ କୁଦରେ ତ' ଦିବସ ବିତାନ୍ତି

  ମନରେ ନ' ରଖି ଗର୍ବ।-୪

ଉତ୍କଳ ମାଟିରେ ରଜ ପରବଟି

  ପତିଳ ଯେ' ତିନି ଦିନ।

ପିଠା ପୋଡା ପୋଡି ବସୁମତୀ ସ୍ନାନ

  ମିଶାଇକି ପାଞ୍ଚ ଦିନ।-୫

ପ୍ରଥମ ଦିବସ ପହିଲି ରଜଟି

  ଦ୍ୱିତୀୟେ ରଜ ସଂକ୍ରାନ୍ତି।

ତୃତୀୟ ଦିବସ ଭୂମି ଦହନ ଯେ'

  ସର୍ବେ ଆନନ୍ଦେ ପାଳନ୍ତି।-୬

ଘରେ ଘରେ ପିଠା ପଣା ମହକରେ

  ଗାଆଁ ଦାଣ୍ଡ ବାସି ଉଠେ।

ନୃତ୍ୟ, ବାଦ୍ୟ ସାଥେ ସୁନ୍ଦର ସଙ୍ଗୀତ

  ପରିବେଶ ଶୋଭା ମଣ୍ଡେ।-୭

ହଳ ଲଙ୍ଗଳକୁ ଶୀଳ ଶୀଳପୁଆ

  ବସୁମତୀ ସ୍ନାନେ ପୂଜା।

ଧରଣୀ ମାଆକୁ ହଳଦୀ ଲଗାଇ

  ଫୁଲ, ସିନ୍ଦୁରରେ ସଜା।-୮

ବନ୍ଧୁ ପରିଜନ ଆତ୍ମୀୟ ସ୍ୱଜନ

  ହୋଇଥାନ୍ତି ଆତ ଜାତ।

ଘର ପୁରି ଉଠେ ହର୍ଷ ଉଲ୍ଲାସରେ

  ସଭିଏଁ ଯେ' ବିମୋହିତ।-୯

ଛକ, ବଜାରରେ ଆମ୍ବ ତୋଟା ଠାରେ

  ଭିଡର ଆସର ଜମେ।

ତାସ୍ , ବାଗୁଡି, ଲୁଡୁ ଖେଳ ସାଥେ

  ମିଠା ପାନ ମନ କିଣେ।-୧୦

ଆରିସା, କାକରା, ପୋଡ଼ ପିଠା ସାଥେ

  ମିଠା କେତେ ପରକାର।

ବୋଉ ହାତ ରନ୍ଧା ତିଅଣ ସୁଆଦ

  ନାହିଁ ତାର ପଟାନ୍ତର।-୧୧

ରାଗ, ଅଭିମାନ ମନୁ ଦୂର କରି

  ଖୁସିରେ ବିତାଅ ରଜ।

ଆଜିର ଜୀବନ କାଲିକୁ ତ' ନାହିଁ

  ଏକଥା ମନୁ ନ' ହେଜ।-୧୨