ପରିଚୟ

ଅନେକ ଭାବିଛି ପରିଚୟ ମୋର

   ସତେକି ମୁଁ ଅନନ୍ତ ଆକାଶର ଏକ ଗୁଡି!

ଯେମିତି ଚାହୁଁଛ ସେମିତି ଉଡୁଛି

   ଅଦୃଶ୍ୟ ତୁମ କୁହୁକ ବନ୍ଧନ ମୋହେ ବୁଡି ।

ମୁଁ ଏକ ପ୍ରବାହମାନ ନଦୀଧାରା

   ଭରିଛ ଜୀବନେ ବିପୁଳ ଶକ୍ତି ଅସରନ୍ତି  

କୁଳୁ କୁଳୁ ନାଦେ ବୋହିଯାଏ ପରା

   ତୁମେହିଁ ଦେଇଛ ଅବିରତ ତଡିତ୍ ଗତି ।

ଦେଖିଛି ନିଜକୁ ବାଡି ଗେଣ୍ଡୁଫୁଲେ

   ଯଦ୍ୟପି ଅଂଶ ମୁଁ ଗୁଛ୍ଛର, ନିତାନ୍ତ ସ୍ବତନ୍ତ୍ର

ନିରାପଦ ମୁଁ ସମାଜ ଗୁଛ୍ଛମୂଳେ

   ତବ ଆଶିଷେ ଲଭିଛି ନିଜସ୍ବ ଯୁଦ୍ଧମନ୍ତ୍ର ।

ଭାଂଗିଲେ ଦମ୍ଭ ଆସିଲେ ପ୍ରଶ୍ନଘଡି

   ପାଇଛି ସ୍ବଅନ୍ତରେ ସନ୍ଧାନ ଦକ୍ଷ ବିନ୍ଧାଣୀ

ବିନ୍ଧାଣୀ ଦିଏ ରକ୍ଷା କବଚ ଗଢି

   ବିପଦେ ଶୁଭଇ ତୁମ ଅମୃତ ଦିବ୍ୟବାଣୀ ।

ଅନେକ ଭାବିଛି ପରିଚୟ ମୋର

   ତୁମେ ସଂଗୀତସିନ୍ଧୁ ମୁଁ କ୍ଷୁଦ୍ରାତିକ୍ଷୁଦ୍ର ରାଗ

ତୁମଠୁ ଉତ୍ପନ୍ନ ବିଲୟ ତୁମଠି

    ମହାକାଳ ତୁମେ ମୁଁ ନିହାତି ନଗଣ୍ୟ ଭାଗ।