ଫେରେଇ ଦିଅ ମୋ

ଦେବାକୁ ଚାହୁଁଛ ଯଦି

ଫେରେଇ ଦିଅ ମୋ

ସ୍ବପ୍ନିଳ ବାଲ୍ୟକାଳ

ଯହିଁ ଥିବ ନାହିଁ ଜମା

ଚିନ୍ତା ଆଶଙ୍କାର ହଳାହଳ ।

ଦେବାକୁ ଚାହୁଁଛ ଯଦି

ଫେରେଇ ଦିଅ ମୋ

ବ୍ୟାକୁଳ ସ୍କୁଲ ବେଳ

ସାଙ୍ଗ ମେଳେ ନ ଥିବ ଜମା

ସମୟର ଚକ୍ରବାଳ

ମଜା ମସ୍ତି ଖେଳ କୁସ୍ତି ଭିତରେ

ଅନନ୍ତ ରାସ ମେଳ ।

ଦେବାକୁ ଚାହୁଁଛ ଯଦି

ଫେରେଇ ଦିଅ ମୋ

କଳ୍ପିତ ସାମ୍ରାଜ୍ୟ

ଯହିଁ ଥିବ ନାହିଁ ଜମା

ରାଗ ରୋଷ ଅଭିମାନର ଫଉଜ ।

ଦେବାକୁ ଚାହୁଁଛ ଯଦି

ଫେରେଇ ଦିଅ ମୋ

ମୁକୁଳା ଯୌବନ

ଯହିଁ ଥିବ ନାହିଁ ଜମା

ରୁଗ୍ଣ ମାନସିକତାର ପ୍ରତିଫଳନ ।

ଦେବାକୁ ଚାହୁଁଛ ଯଦି

ଫେରେଇ ଦିଅ ମୋ

ବାଣୀବିହାର ଛାତ୍ରାବାସ

ଯହିଁ ଥିବ ଖାଲି

ସ୍ଵାଧୀନ ବିଚାର ଅନନ୍ତ ବିହାର

କୃଷ୍ଣଚୂଡାର ଶିହରିତ ମଧୁମାସ ।