ନୂଆବର୍ଷ
ନୂଆବର୍ଷ
ନୂଆ ପୁରୁଣାର ହିସାବ ଭିତରେ
ଚାଲେ ଅମୀମାଂସିତ ଜୀବନର ସଂଘର୍ଷ
ଆସି ନାହିଁ ଯିଏ ଅଜଣା ଅଚିହ୍ନା ସେ
ନୂଆ ବୋଲି ମାନସିକତାକୁ କରେ ଉଦବେଳିତ l
ଉତ୍କଣ୍ଠା ଆବେଗ ଆଣି କରାଏ ସକ୍ରିୟ
ଅଦେଖା ସେ ଭବିଷ୍ୟତ ହିଁ ତ ନୂଆ
ଆସେ ବର୍ତ୍ତମାନର ରୂପ ରଙ୍ଗ ନେଇ ସାମ୍ନାକୁ
ସେକେଣ୍ଡ୍ କଣ୍ଟାଟିଏ ଦେଲେ ଥରେ ମୁଣ୍ଡ ଟୁଙ୍ଗାରି l
ନୂଆରୁ ପୁରୁଣା ହୋଇ ହୁଏ ସେ ଅତୀତ
ତା' ଭିତରେ ଘଟିଯାଏ ଅନେକ କିଛି
ସମୟର ସଠିକ୍ ନିର୍ଦ୍ଧାରଣ କରିବାର ଏ ସୂତ୍ର
ସବୁକୁ ସଜାଇ ସାଇତି ରଖେ ତା' ସାରଣୀରେ l
ଆସୁଥିବା ପ୍ରତିଟି ମୁହୂର୍ତ୍ତ ନୂଆ
ମନର ଉଷ୍ମତାରେ ଭରିଦିଏ ଶିହରଣ
ବିଗତ ତିକ୍ତତାକୁ ଭୁଲି ବଞ୍ଚିବାକୁ କରେ ସାଲିସ୍
ଆଜି ଯାଏଁ ଭେଟିଥିବା ସବୁ ସମୟ l
ହୋଇଛି କିଛି ଭୁଲା ଆଉ କିଛି ଅଭୁଲା ସ୍ମୃତି
ତାକୁ ଓଟାରି ଆଣି ସମୟ କରେ ସ୍ଵାଗତ ଯାହାକୁ
ସେ ନୂଆବର୍ଷ ନୂଆ ଏକ କ୍ୟାଲେଣ୍ଡର
ସଜାଇ ହୋଇଛି ମାସ ପରେ ମାସର ତାରିଖରେ l
ବଢ଼ାଇବାକୁ ବୟସ କମାଇବାକୁ ଆୟୁଷ
ହସକୁ ମାପି ଲୁହକୁ ଚାପି ଗଢ଼ି ଦିଏ ଜୀବନ
ସ୍ବପ୍ନକୁ ସାକାର କରିବାର ପ୍ରସ୍ତୁତ ହୁଏ ଯୋଜନା
ସମୟର ତାଳ ବେତାଳରେ ଚାଲୁ ଚାଲୁ l
ଝୁଣ୍ଟି ପଡ଼ି ହେଲେ ଲହୁ ଲୁହାଣ
ତୃଷ୍ଣା ଯେତେ ହୋଇ ଯାଏ ବିତୃଷ୍ଣା
ନୂଆବର୍ଷର ସଂକଳ୍ପ ଆପଣାଏ ଆଉ ଏକ ବିକଳ୍ପ
ବିଭ୍ରାନ୍ତିର କୋଳାହଳରେ ନୀରବି ଯାଏ l
ଅନ୍ତରରୁ ସ୍ଵତଃ ପ୍ରବୃତ୍ତ ବାହାରି ଆସୁଥିବା ଶବ୍ଦ
ନୂଆରେ ନ ଥାଏ ଆଉ ସ୍ଵତନ୍ତ୍ର ରୁଚି
ସକାଳର ସଜଫୁଲ ସଞ୍ଜକୁ ମଉଳିଲା ପରି
ମଳିନ ନିସ୍ତେଜ ହୁଏ ଆଶା ଆକାଂକ୍ଷା ସବୁ l
ଆସେ ନୂଆବର୍ଷ ପୁଣି ଥରେ କରି ଦେବାକୁ ସଜାଗ
ତା' ଭିତରେ ନୂଆ କରି ଖୋଜିବାକୁ ଜୀବନ
ଦିଏ ପ୍ରେରଣା ଯୋଗାଏ ଇନ୍ଧନ
ନୂଆବର୍ଷ ବୁଝାଏ ନବୀକରଣର ଦର୍ଶନ।