ନୂଆବର୍ଷ ଆସୁଛି
ନୂଆବର୍ଷ ଆସୁଛି
ନୂଆବର୍ଷର ପାଦଶବ୍ଦ ଶୁଣି
ବୁଝିଗଲିଣି ମତେ କିଛି କରିବାକୁ ହେବ
ଏଇ ଯେମିତି ସମସ୍ତ ଦୁଃଖର ପିଆଲାକୁ
ଆକଣ୍ଠ ପାନ କରି ନୀଳକଣ୍ଠ ସାଜି
ହାଏ ହାଲୋ ନକରି ସ୍ୱାଗତ କରିବାକୁ
ସମସ୍ତ ରାଗ ରୋଷ ମାନ ଅପମାନ
ଉମ୍ହେଇ ଜାଳି ପ୍ରତୀକ୍ଷା ଏନ୍ତୁଡ଼ିଶାଳେ
ଯନ୍ତ୍ରଣା ଲୁହ ଲହୁ ପିଇଦେଇ
ଷଷ୍ଠୀଘର ଚୂନ ମାରିବାକୁ
ଏମିତି ତ ପ୍ରତିବର୍ଷ ହୁଏ
ଭାବିଛି ଏବର୍ଷ ନିଆରା ଢଙ୍ଗରେ ନକଲେ
କାଳେ ଶ୍ରମିକମାନେ ଫସିଯିବେ ସୁଡ଼ଙ୍ଗରେ
ନବଜାତକ ବୋରୱେଲ ଭିତରେ
ଅଦିନିଆ ମେଘ ମାଘରେ ଆସିବ ବଣୁଆ ବାଘ
କରୋନାର କଟକଣା
ଅନାହୁତ କେତେ କା ଠିକଣା
ଯୁଦ୍ଧ କାଳେ ମାଗିବ ଘରଭଡା
ରାଜ୍ୟରେ ଦେଶରେ ବା ମାଟିମାଆ ବକ୍ଷରେ
ସବୁଥିରୁ ବଞ୍ଚିତ କରି ଘୋଡାଇ ରଖିବାକୁ
ମାଆଟିଏ ପରି ବାତ୍ସଲ୍ୟରେ ପଣତ ଭିତରେ
ମମତାର ଫଲ୍ଗୁ ଗୁନ୍ଥି
ଅପେକ୍ଷା କରିଛି ନବବର୍ଷ ଆସ
ଶିଶୁର ହସ ନେଇ ପଶୁର ଭାଷା ବୁଝି
ହୋଇଯାଅ ଅନ୍ୟ ଏକ ଦେବଦାସ
ଅବା ବିଶ୍ୱାମିତ୍ର ହୋଇ ମରାରୁ ରାମ କହି କହି
ଭେଟି ଦିଅ ନବପଲ୍ଲବ
ସ୍ନେହ ପ୍ରେମ ମମତା ଭାଇଚାରା ପ୍ରୀତି
ମୈତ୍ରୀ ସହନଶୀଳତା ଭଲପାଇବାର ଗଭୀରତା
ସାଙ୍ଗକୁ ଦୂରେଇ ପରଶ୍ରୀକାତରତା ।।