ନବରତ୍ନ
ନବରତ୍ନ
ବାସଗୃହ ଠାରୁ ଦୂରେ ରହୁଥିଲା
ସ୍ନାନାଗାର ପାଇଖାନା
ପାଦର ପାଦୁକା ଦୁଆରେ ରହିବ
ଘରେ ପଶିବନି ଜମା ।
ପାଦ ହାତ ଧୋଇ ଗୃହକୁ ପ୍ରବେଶ
ନ ଥିଲା ଅନ୍ୟ ବାହାନା
ସ୍ନାନ ନ ସାରୁଣୁ ରୋଷେଇ ଘରକୁ
ସମ୍ପୂର୍ଣ୍ଣ ରୂପେ ଯେ ମନା ।
ସ୍ନାନ ଶେଷ ପରେ ଅଗାଧୁଆ ଲୋକେ
ଛୁଇଁବା ତ ଥିଲା ଘୃଣା
ଶ୍ମଶାନ ରୁ ଫେରି କିମ୍ବା ଚୁଟି କାଟି
ଅଗାଧୁଆ ଗୃହେ ମନା ।
ଜନମ ମରଣ ଗୃହେ ଦଶ ଦିନ
ସଙ୍ଗରୋଧ ବାଧ୍ୟ ସିନା
ଶବ ଉଠା ଘର ଖାଦ୍ୟ ପଦାର୍ଥ ଯେ
ଦଶ ଦିନ ପାଇଁ ମନା ।
ଲୁଗା ପଟା ସବୁ ତୋଠେ ସଫା ହେବ
ଇସ୍ତ୍ରି ଚେଙ୍କ ହେବ ସିନା
ନଅଟି ଉପାୟ ପାଳନ ନ କରି
ଏବେ ପାଉଛେ ଯନ୍ତ୍ରଣା ।
ପାଶ୍ଚାତ୍ୟ ସଂସ୍କୃତି ଆମ ସଂସ୍କୃତିକୁ
ପରିହାସେ କଲା ଘୃଣା
ପୁରୁଣା କାଳିଆ ବୋଲି କହିବାରୁ
ଆମେ ହୋଇଗଲେ ବଣା ।
ବିକଟାଳ ରୂପ ଅରୂପ ଧରିଛି
ତାଣ୍ଡବ ମୃତ୍ୟୁ ଯନ୍ତ୍ରଣା
ଆପଣାର ଦୋଷେ ରୋଗ ଦୁଃଖ ଶୋକ
କରୋନା ମାତ୍ର ବାହାନା ।
ଧନ୍ୟ ଆମ ମୁନି ଋଷି ସନ୍ଥ ଜନ
ଧନ୍ୟ ତାଙ୍କରି କରୁଣା
ଆମ ସଂସ୍କୃତିରେ ଚଳି ଆସିଥିଲେ
ଆସି ଥାଆନ୍ତା କି କରୋନା ।