ନବୀନ ଆଶାର ଜ୍ଯୋତି

ସ୍ରଷ୍ଟାଙ୍କର ଶ୍ରେଷ୍ଠ ସୃଷ୍ଟି ମାନବ 

ଏହି ଜନ୍ମଟି ଅତ୍ୟନ୍ତ ଦୁର୍ଲଭ ।

ପୂର୍ବ ଜନ୍ମର ଥିଲେ ଯେ ସୁକୃତ

ମନୁଷ୍ୟ ଜନ୍ମ ହୁଅଇ ପ୍ରାପତ ।

ଶିଶୁ ଅଟଇ ଅମୃତ ସନ୍ତାନ

ଭବ ଉଦ୍ୟାନେ କଳିକା ସମାନ ।

ଶିଶୁ କଳିକାର ହେଲେ ବିକାଶ

କଳିକାରୁ ପୁଷ୍ପ ପରିପ୍ରକାଶ ।

ମନ୍ତ୍ରମୁଗ୍ଧ କରେ ଯେହ୍ନେ ପ୍ରସୁନ 

ଶିଶୁ ହସରେ ଉଲ୍ଲସିତ ପ୍ରାଣ ।

ଶିଶୁ ଅଟଇ ଅବୋଧ-ଅଜ୍ଞାନ 

ଛଳ-କପଟ ତାହାର ଯେ ଶୂନ୍ୟ ।

କେହି ନାହାନ୍ତି ଶତ୍ରୁ-ମିତ୍ର ତା'ର

ସମସ୍ତଙ୍କୁ କରଇ ଆପଣାର ।

ଆଶା-ଭରସାର ଶ୍ରେଷ୍ଠ ଦ୍ଯୋତକ

ସମାଜକୁ ଦେଖାଏ ସେ ଆଲୋକ ।

କଞ୍ଚା ମାଟି ପରି ତା'ର ସ୍ବରୂପ

ଯଥା ଗଢିଲେ ହେବ ସେହି ରୂପ ।

ଭବିଷ୍ୟତର ସେ ଯେ ନାଗରିକ

ରାଷ୍ଟ୍ର ପାଇଁ ହେବ ମହାନାୟକ ।

ତା'ର ମୁଖଲାବଣ୍ଯର ଦର୍ଶନ 

ମିଳେ ନବୀନ ଆଶାର କିରଣ ।

ଅସ୍ଥିର ପଦପାତର ଗମନ

ସମସ୍ତଙ୍କୁ କରଇ ଆକର୍ଷଣ ।

ବାଳୁତ ଦୃଷ୍ଟିରେ ସର୍ବେ ସମାନ

ଥାଏ ଭେଦଭାବ ରହିତ ଜ୍ଞାନ ।

ଶ୍ରୀରାମଙ୍କ ଅପୂର୍ବ ଶିଶୁ ଲୀଳା

ଶ୍ରୀକୃଷ୍ଣଙ୍କ ଲୀଳା ବିଚିତ୍ର ଥିଲା ।

ଶିଶୁ ଦିବସେ ସଭିଙ୍କୁ ଆଶିଷ

ଶିଶୁ ମୁହଁରେ ସଦା ଫୁଟୁ ହସ ।