ମୁଁ ହେଇଛି ସ୍ଵାଧୀନ

ପିମ୍ପୁଡ଼ିହେଇ ମୁଁ ଦୀପକୁ ଚଢିଛି ସରଗକୁ ହାତ ଛୁଏଁ,

ଘରଚିଜ ମୋତେ ଭଲ ଲାଗେନାହିଁ ପର ଜିନିଷକୁ ଚାହେଁ |

କୁକୁରକୁ ଧରି ବାହାଘର କରେ ପାହାର ଖାଏ ମୋ ଗାଈ,

ଷଣ୍ଢକୁ ଫିଟେ ମୁଁ ପଥର ଷଣ୍ଢକୁ ପୂଜାକରେ ମଥା ନୋଇଁ |

ବଞ୍ଚିଥିବା ଯାଏ ଗାଳି ମାଡ଼ ଦିଏ ମୂର୍ତ୍ତିରେ ଚଢାଏ ମାଳ,

ଗାଡ଼ି ମୋର ଚାଲେ ରକେଟ ସମାନ ଦେଖାଏ ମୋ ବାହୁ ବଳ |

ମାଗଣା ମିଳିଲେ ଆଗରେ ଥାଏ ମୁଁ ଧାଡ଼ିରେ ଥିଲେ କେ ଥାଉ,

ନରମ ଦେଖିଲେ ଗରମ ଦେଖାଏ ଛକ ଜାଗାରେ ମୋ ଭାଉ |

ଦାଦାଚାନ୍ଦା ମାଗେ ଥରେ କି ଦି' ଥର ତା'ପରେ ଦେଖାଏ ଛୁରୀ,

ବିଚରା ବେପାରୀ ପାଟି ଖୋଲେନାହିଁ ଦିଏ ସୁନାପିଲା ପରି |

ପୁଲିସ ସହିତ ବସେ ଖାଏ ପିଏ ତାଙ୍କ ଭାଗ ଦେଇଦିଏ,

କାହାର ସାହସ ଅଛି ଲଢିବାକୁ ମୋ ଆଗକୁ ଆସୁ ସିଏ |