ମୋ ଲୁହର କଣ ଓଜନ ନାହିଁ
ମୋ ଲୁହର କଣ ଓଜନ ନାହିଁ
ମୁଁ ପୁଅ ବୋଲି
କଣ ମୋ ଲୁହର ଓଜନ ନାହିଁ ?
ଖେଳୁଛ, ଖେଳ
ଖେଳ ସରିଗଲେ ତୁମେ ବି କାନ୍ଦିବ କାହା ପାଇଁ,
ମୁଣ୍ଡ ଉପରେ ଆକାଶଟେ ଖୋଜିବ
ପାଦ ତଳେ ମାଟି ଟିକେ ଲୋଡ଼ିବ
କେହି ଜଣେ ପିଠି ଥାପୁଡ଼େଇ
ତୁନି କରୁ ବୋଲି ଭାବିବ
ତଥାପି ମୋର ଅଭିମାନ ତୁଟିବ ନାହିଁ l
ତୁମେ ମିଛକୁ ସତ କରିଦେଇ ପାର
ଫେମିନିଜିମ ପରି ଗୋଟେ କ୍ଷୁଦ୍ର ଶବ୍ଦର ଆଢୁଆଳରେ
ମୋ ପ୍ରେମ ଭିକ୍ଷାକୁ
ପାଦରେ ଆଡ଼େଇ ଦେଇ ପାର
ନୂଆବୋହୂଟିଏ ଗୃହ ପ୍ରବେଶବେଳେ କଳସୀଠେଲି ଦେବା ପରି
ହେଲେ ମୁଁ ପାରେନା
ପାରେନା ବୋଲି ତ କାନ୍ଦେ
ପାରେନା ବୋଲି ତ ବାରମ୍ବାର ଭୁଲ ନ ଥାଇ ବି ଭୁଲ ମାଗେ
କାକୁତିମିନତୀ ହୁଏ
ନିଜ ପୁରୁଷତ୍ୱପଣକୁ ପକେଟରେ ଲୁଚେଇ
ତୁମ କଟାକ୍ଷକୁ ସହିଯାଏ
କାହିଁକି ନା ମୁଁ ବୁଝେ
ପ୍ରେମରେ କେବଳ ପ୍ରେମ ଥାଏ
କିନ୍ତୁ ତୁମେ ବୁଝ
ପ୍ରେମରେ ପ୍ରେମ ଛଡ଼ା ଆଉ ସବୁକିଛି ଥାଏ l
ତୁମେ ଚାହଁ କି ନ ଚାହଁ
ତୁମେ ଆଉ ଥରେ ଲୁହ ଝରେଇବ ମୋ ପାଇଁ,
ଯୋଉଦିନ ବୁଝିଯିବ ଲୁହର ଓଜନ
ଲୁହାଠାରୁ ବି ଅଧିକ
ଅଥବା ମୋ ଛଡ଼ା ତୁମ କଥା ଭାବିବାକୁ ଆଉ କେହି ନାହିଁ l