Library
Profile
ମୋ ଗାଁ ଭାରି ବାସେ
ମୋ ଗାଁ ଭାରି ବାସେ
ମୋ ଗାଁ ବାସନା ନିଆରା ନିଆରା
ସବୁ ମନ ନିଏ ମୋହି
ଶୀତ ହେଉ ଅବା ବରଷା କାକର
ମହୁଆ ମଳୟ ବହି
ପହିଲି ବରଷା ବରଷଇ ଯେବେ
ଭିଜା ମାଟି ଭାରି ବାସେ
ଧାନ ହାଟ କରି ଫୁଲ ଉଡାଇଲେ
ଗାଁମୁଣ୍ଡଯାଏ ବାସେ
ମେଘୁଆ ରାତିକୁ ମହକାଇ ଦିଏ
ଝରା ସେଫାଳୀର ବାସ
ସକାଳୁସକାଳୁ ଘାସ ଗାଲିଚାରେ
ବିଛେଇ ଯାଏତା ହସ
ଶୀତୁଆ ସକାଳେ ଧାନ ହୁଏ ଉ°ସା
ଆଈ ଜାଳେ ବସି ଚୂଲି
ଅଧା ସିଝା ଧାନ ମହକକୁ କୁହ
କେମିତି ପରିବି ଭୁଲି
ଫଗୁଣ ଆସିଲେ ମହୁଲ ଗଛରେ
ରଙ୍ଗଯାଏ ସତେ ଭରି
ମହୁଲ ଫୁଲର ମହୁଲି ମହକେ
ମନଯାଏ ମୋର ପୂରି
ଆମ୍ବ ବଉଳର ବାସ ଚହଟିଲେ
କୋଇଲି ହୁଅଇ ବଣା
ମିଠା ଗୀତେ ତାର ମନ ହଜିଯାଏ
ବେଳ ପଡେନାହିଁ ଜଣା
କିଆ କେତକୀର ବାସ ଚହଟିଲେ
ପାଦ ଯାଏ ଝୁମିଝୁମି
ପାଗଳ କରଇ ତମାଳ ବନର
ବାସନା ଗଲେରେ ଚୁମି
ଝାଞ୍ଜି ପବନରେ ମାଟିକୁ ତତେଇ
ଗୀରିଷମ ଯେବେ ଆସେ
ମଧୁମାଳତୀ ଓ ମଲ୍ଲିଫୁଲ ଫୁଟେ
ମହମହ ହୋଇ ବାସେ
ମୋ ଗାଁ ମହକ ମୋ ଗାଁ ବାସନା
ଅଜଣା ପୁଲକ ଭରେ
ନିତି ଶିଖାଏ ସେ ନୂଆନୂଆ କଥା
ସପନର ନଈ ଧାରେ ।
