ମାତୃ ଦିବସ ବନାମ ଶାଶୁ ମାଆ ଦିବସ

ବାହା ହେଲାପରେ ଗାଆଁ ଛାଡିଥିଲି

    ଭାରିଜା ବୁଦ୍ଧିରେ ପଡି 

ବୋଲକରା ହୋଇ ଉଠୁଛି ବସୁଛି

  ନହେଲେ ଦେଉଛି ଝାଡ଼ି ।

ପୁଣି ଦେଖାଉଛି କୋର୍ଟ କଚେରୀ 

   ଥାନା ନାଲି କୋଠା ବାଡ଼ି 

କଥା ନମାନିଲେ ନେଇଯିବ ମୋତେ

   ମିଥ୍ୟା ଅଭିଯୋଗ ବାଢ଼ି ।

ବୃଦ୍ଧା ମାଆ ସଙ୍ଗେ ଭାଇ ଓ ଭଉଣୀ

    ଅଛନ୍ତି ମୋ ବଂଶ ପିଢ଼ି 

 ଦେଖିବାକୁ ଦିନେ ଘରକୁ ଯାଇନି

    ପାଚିଲାଣି ନିଶ ଦାଢ଼ି ।

କେତେଥର ମାଆ ଖବର ପାଇଛି

   କାନ୍ଦୁଛି ସେ ମୁଣ୍ଡ କୋଡ଼ି 

ଗାଆଁ ଯିବା କଥା ଶୁଣିଲେ ଘରଣୀ

   ଆସେ ଅଦିନିଆ ଝଡି ।

ଇଚ୍ଛା ଥିଲେ ମଧ୍ୟ ଯାଇ ପାରୁନାହିଁ

   ବାଟ ମୁଁ ଯାଉଛି ହୁଡ଼ି 

କୋପ ତା'ର ସହି ମନକୁ ବୁଝେଇ

   ରହିଛି ସହରେ ପଡି ।

ରାକ୍ଷୀ ବାନ୍ଧିବାକୁ ଭଉଣୀ ହାତରୁ

  ଯିବାକୁ ହେଲେ ମୁଁ ରେଡି 

ଶାଳୀ ଜଗିଥାଏ ଦୁଆର ମୁହଁରେ

  ପଛରୁ ଧରେ ମୋ ଭିଡି ।

ଭାଇଟା ମୋହର କଦବା କୋଚିତି

  ଆସିଲେ ଘରକୁ ମାଡି 

ଭାରିଜାଟି ମୋର ଗରଗର ହୋଇ

   ମୁହଁକୁ ଦିଏ ତା ମୋଡି ।

ଶଳା ଯଦି ଆସେ ସହାସ୍ୟରେ ଭାଷେ

   ଗୋଡ଼କୁ ଧୀରେ କଚାଡି 

ବାର ଅଛି ଆଜି ଆଣିବାକୁ ହେବ

  ଦେଶୀ କୁକୁଡାଟେ ମୋଡ଼ି ।

ଭାଇଟା ତାହାର ଭଲ ପାଏ ବେଶି

   ନଈର ଦେଶୀ ଚିଙ୍ଗୁଡ଼ି 

ଛେଚା କରି ତାକୁ ଚଟଣି କରେ ସେ

  ଓଭେନ ଭିତରେ ପୋଡି ।

ମାତୃ ଦିବସରେ ଯିବାକୁ ଭାବିଲି

   ମନେ ମନେ ଗଲି ଚିଡି 

ସ୍ଥିର କଲି ନିଶ୍ଚେ ଘର ଆଡ଼େ ଯିବି

   ସହରକୁ ଆଜି ଛାଡି ।

ମାତୃ ଦିବସଟି ଗାଆଁରେ ପାଳିବି

   ମାଆ ମମତାରେ ବୁଡି 

ଖାଇବି ଖୁସିରେ ମାଆ ହାତ ରନ୍ଧା  

   ପଖାଳରେ ଶାଗ ବଡ଼ି ।

ମାଆ ପାଇଁ ଯାଇ ବଜାରୁ ଆଣିଲି

  ଖଣ୍ଡେ ପସାପଲି ଶାଢ଼ୀ 

ଘରଣୀ ନଜର କେମିତି ପଡିଲା

  ଉପରେ ଗଲା ମୋ ଚଢି ।

ବିଦ୍ରୁପ ସ୍ୱରରେ ତାଛଲ୍ଯ କରିଲା

  ହାତରୁ ନେଲା ମୋ କାଢି 

ପାଖକୁ ଆସିଲା କାନରେ କହିଲା

  ରାଗେ ହୋଇ ଭିଡିମୋଡି ।

''ଜାଣିଛ ଦେଖୁଛ ଅନେକ ଦିନରୁ

  ମାଆ ମୋ ରହିଛି ପଡି 

ମୋ ମାଆ କଣ ତୁମ ମାଆ ନୁହେଁ

   ଯିଏ ତୁମ ଶାଶୁ ବୁଢ଼ୀ ।

ଅଯଥାରେ କାହିଁ ଘରକୁ ଯିବାକୁ

   ଛାଡୁଅଛ ଭେମା ରଡି 

ଶାଶୁ ମାଆ ନାମେ ଦିବସ ପାଳିବା

   ଖାଇବା ଖିରି ଖେଚୁଡ଼ି ।