ଲୁହରେ ଲେଖା ତୋ ନାଁ
ଲୁହରେ ଲେଖା ତୋ ନାଁ
ମନ ଚୋରି କଲୁ ଭରସା ବି ଦେଲୁ
ସମ୍ପର୍କ ବନ୍ଧନେ ନେବାକୁ ତୋଳି
କେଉଁ ଦୋଷ ଥିଲା ମୋତେ ପର କରି
ଆନ ହାତ ଧରି ଗଲୁ ତୁ ଚାଲି ।
ମିଛ ସଂସାରରେ କେ ନୁହେଁ କାହାର
ବୁଝି ବି ଅବୁଝା ହୁଅଇ ମନ
ପୂର୍ଣ୍ଣିମା ଆସିଲେ ହାତଠାରି ଡାକେ
ସତେ କି ଆକାଶେ ପୀରତି ଜହ୍ନ !
ଜୋଛନାରେ ଭିଜି ଯାଉଥିଲେ ହଜି
କିପରି ତୋଳି ପୀରତି ସଉଧ
ଯେତେସବୁ ସ୍ମୃତି ମନ ତଳେ ମାତି
ଗାଇ ଉଠଇ ବିରହ ସଙ୍ଗୀତ ।
ଯେତେ ଥର ମୋର ମନକୁ ପଚାରେ
ଗୋଟିଏ ଉତ୍ତର ପ୍ରତିଧ୍ବନିତ
ହରାଇ ସକଳ ବିଶ୍ବାସ ଭରସା
ଛଳନାରେ ତୋର ମୁଁ ପ୍ରତାରିତ ।
ପ୍ରତାରଣାରେ କି ଅସହ୍ୟ ବେଦନା
ଆଜି ଅଙ୍ଗେଅଙ୍ଗେ ଲିଭାଉଅଛି
ମରମ ପୋଡୁଛି ହୃଦୟ ଜଳୁଛି
ଲିଭାଇବାକୁ ବା ଆଉ କେ ଅଛି !
ଶେଷ କଥା ମୋତେ କହି ଦେଇଗଲୁ
ସୁଖରେ ଜୀବନ ଜୀଇଁବା ପାଇଁ
ତୁହି ପରା ମୋର ସବୁ ଖୁସି ସୁଖ
ଜାଣି ବି ଅଜଣା ଗଲୁ ତୁ ହୋଇ ।
ପ୍ରେମ ଚିରନ୍ତନ ପ୍ରେମ ହିଁ ଶାଶ୍ବତ
ତୋଠାରେ ପ୍ରଥମ ତୋଠାରେ ଶେଷ
ଏ ଜନମ ପାଇଁ ଲୁହ ମାଖି ହୋଇ
ରହିଗଲା ମନେ ଯା' ଅବଶୋଷ ।
ଆନକୁ ନିଜର କରି ପାରିବିନି
ତୁହି ଥିଲୁ ପରା ମୋର ଦୁନିଆ
ଏକାନ୍ତ ନିଜର ସାଥୀ ଲୁହ ମୋର
ଚିରଦିନ ସେଥେ ଲେଖା ତୋ ନାଁ ।