କଣ ଫେରି ପାଇବା ଅତୀତକୁ

ତମାମ ଝଡଝଞ୍ଜା ଭିତରେ ହସି ହସି 

କଟାଇବାକୁ ପଡେ ଜୀବନର ତରୀ

କୋମଳ ହୃଦୟ ସହିତ ଉତ୍ତର ଦାୟିତ୍ୱ 

ନେବାକୁ ପଡେ କଷ୍ଟ ପଥର ଯାତ୍ରୀ ।

ଭଗବତ ଘର ଓ ଟୁଙ୍ଗୀ ଆଉ ଦେଖିବାକୁ 

ମିଳୁନି, କଣ ଫେରି ପାଇବା

ପିଲାଦିନ କଟି ଯାଇଛି, ଭାବେ କଣ ସତରେ 

ଆଉ ଫେରି ପାଇବା ।

ସଂସାର ଯାତ୍ରାରେ କୋହ ଆଉ ଅସରନ୍ତି 

ଲୁହକୁ ପଡେ ଚାପି ରଖିବାକୁ

କୌଣସି ପ୍ରତିଦାନର ଆଶା ନରଖି କାର୍ଯ୍ୟ 

କରିବା ଛାଡିବାନି ନିଜ ତ୍ୟାଗକୁ ।

ସମୟ ବଡ ବଳବାନ, ଜୀବନ ନୌକାରେ 

ସଂସାରରୂପୀ ନଦୀକୁ ପାରି ହେବାକୁ 

ମନରେ ହସ ସୃଷ୍ଟି ନିମିତ୍ତ ଦରକାର କିଛି 

ହସେଇ ପାରିବା ଢଗ ଢମାଳିକୁ ।

ମନେ ପଡ଼େ ଆଜି କିଛି ଢଗ ଶୁଣି ଥିଲି 

ମୁଁ ମୋର ପିଲା ଦିନରେ

ପାଉନି ଖୋଜି ହ୍ୱାଟସ୍ଆପ, ଫେସବୁକ 

ଅବା ଇନଷ୍ଟାଗ୍ରାମ ଟ୍ୱିଟର ରେ ।

ସେ କଥା ଗୁଡିକୁ ଆଜି କାହିଁକି ମନେ ପଡୁଛି,

ଜାଣି ପାରୁନି

ବିଭିନ୍ନ ସମୟରେ ମନେ ପକାଇବାକୁ, ତାହା

ସବୁ ଲେଖୁଛି ।

ପର୍ବତ ଉପରେ ଘର କରିଥିଲି, 

ପବନ ଉଡେଇ ନେଲା

ତୁମ ପରି ସାଙ୍ଗ ପାଇ ଥିଲି, 

ଝୁରି ଝୁରି ମୋ ଦିନ ଗଲା 

ଉଡିଗଲା ଏରୋପ୍ଲେନ୍ ଛାଡିଗଲା ଧୂଆଁ, 

ବଡ଼ ଲୋକର ପୁଅ ତମେ ପଚାରିବ କିଆଁ I

ସାରୁ ପତରରେ ପାଣି ପଡିଗଲେ 

ପାଣି ହୁଏ ଟଳମଳ, 

ତୁମକଥା ମୋର ମନେ ପଡିଗଲେ 

ଆଖି ହୁଏ ଛଳଛଳ I

ଗୋଲାପ ଗଛରେ ବହୁତ କଣ୍ଟା, 

ତୁମ କଥା ମନେ ପଡେ ଘଣ୍ଟାକୁ ଘଣ୍ଟା I

ଟେବୁଲ ଉପରେ ଟମାଟୋ ଖଟା,

ସାଙ୍ଗକୁ ମୋର ଠିଆ ଗୋଇଠା I

ବାଡ଼ିରେ ଫଳିଛି ବାଇଗଣ, 

ସାଙ୍ଗକୁ ମୋର ଟେକିଆଣ I

ପୋଖରୀ ମଝିରେ ଫୁଟିଛି କଇଁ, 

ଗରିବ ସାଙ୍ଗକୁ ଭୁଲିବ ନାହିଁ l

ଶିବଙ୍କ ମଥାରେ ଫୁଲ ଚନ୍ଦନ, 

ନୂତନ ବର୍ଷର ଅଭିନନ୍ଦନ l

ଅରୁଆ ଭାତକୁ ଟମାଟୋ ଖଟା,

ସାଙ୍ଗକୁ ମୋର ଠିଆ ଗୋଇଠା l

ହାତୀ ଚାଲେ ଦମ ଦମ,

ନୂତନ ବର୍ଷକୁ ସ୍ୱାଗତମ l

ଇଟା ଉପରେ ଇଟା,

ପୁରୁଣା ବର୍ଷ କୁ ଟା ଟା l

ଟେବୁଲ ଉପରେ କାଚ ଗିଲାସ, 

ନୂଆବର୍ଷ ତୁମେ ଜଲଦି ଆସ l

ପଣ୍ଡ ସିନା ଶୁଖିଯାଏ ନଦ ନଦୀ

ସହଜରେ କେବେ ଶୁଖେନା, 

ତୁମେ ସିନା ଭୁଲିଯାଅ, ଆଇ 

କେବେ ଭୁଲେନା l

ଆମ ବାରିପଟେ ପାତଲଘଣ୍ଟା, 

ଚିଠି ପଢୁଥିବ ଘଣ୍ଟାକୁ ଘଣ୍ଟା l

ମଣ୍ଡା ପିଠା ଗୋଲ ଗୋଲ 

ସାଙ୍ଗଲୋ ମୋର କବାଟ ଖୋଲ l

ବାଟରେ ଖାଇବୁ ଗୁପଚୁପ 

ଚିଠି ପଢିବୁ ଚୁପ ଚୁପ l