କିପରି କହିବି କୁହ

ମୋ ସରଳ ବିଶ୍ୱାସରେ 

  ଘୋଟି ଦେଇ ବିଷ ଯଦି

ପ୍ରଭୁ ତୁମେ କରିଲ କପଟ

  କିପରି କହିବି କୁହ

ଅଭାବକୁ ଦୂର ହୋଇ 

  ରହିଥାଅ ସର୍ବଦା ଭାବକୁ ନିକଟ ।

କରୁଣାର କଣା ଯଦି 

  ମୋ ପାଇଁ ହୋଇଲା ଉଣା

ଡାକି କି ପାରିବି କୁହ

  କରୁଣା ସାଗର

ଆଲୋକର ଉତ୍ସ ବୋଲି

  କିପରି କହିବି ଅବା

ମୋର ଚଲା ପଥେ ଯଦି

   ଭରା ଅନ୍ଧକାର ।

କିପରି କହିବି କୁହ

  ସର୍ବବ୍ୟାପୀ ପରମାତ୍ମା ତୁମେ

ସବୁରି ଘଟରେ ଅଛ

   ଆତ୍ମା ରୂପ ନେଇ  ।

ତଥାପି ତ ଧରା ପୃଷ୍ଠେ

   ବଢିଚାଲେ ପାପ ଭାର

ସର୍ବଘଟେ ସର୍ବରୂପେ

   ସବୁଠାରେ ତୁମ ସ୍ଥିତି ଥାଇ ।

ଯଦି ପାର ପ୍ରଭୁ ମତେ

     ଦିଅ କ୍ଷମା କରି

ନିହାତି ଅଧମ ନର

    ମୁଁ ଏକ ଅବୋଧ

ତୁମକୁ ବୁଝିବା ପାଇଁ

  ନାହିଁ ମୋର ଶକ୍ତି ତିଳେ

ଦେବ ଯଦି ଦିଅ ମୁକ୍ତି

  ମାଗୁ ନାହିଁ ସୁଖ ବା ସମ୍ପଦ।