କେମିତି ଅଛ ?

ଭବ ବାରିଧିରେ ସମ୍ପର୍କ ତୁଠରେ

ଯେତେବେଳେ ଜଣେ ଆନକୁ ଭେଟେ

ସତେ କି ଉଭୟ ଅନ୍ତର ଗହ୍ବରୁ

ଆପଣାପଣର ନିର୍ଝର ଛୁଟେ 

ତୁଣ୍ଡରୁ କେମିତି ଅଛ ପଦଟେ

ଆଦାନପ୍ରଦାନ ଆନନ୍ଦ ବିଷାଦ

ମନ ତଳେ ଆସି କେତେ ପ୍ରକଟେ ।

ଭାରି ଭଲ ଲାଗେ ଶୁଣିଦେଲା କ୍ଷଣି

ଆତ୍ମୀୟତା ବୋଳା ଏ ଦୁଇ ଶବ୍ଦ

ଅମୃତ ପରଷି ହୃଦୟ ଆଶ୍ବାସି

ହରି ନେଇଯାଏ ଯେତେ ବିଷାଦ

ଉକୁଟି ଉଠଇ କେତେ ଆନନ୍ଦ

ସେଥିପାଇଁ ପରା ଧରଣୀ ବୁକୁରେ

ନର ନର ମଧ୍ୟେ ଏତେ ସମ୍ବନ୍ଧ ।

ସୁଖ ଭରିଥିଲେ ଉକ୍ତିଗୁଡିକରେ 

ପ୍ରତ୍ୟୁକ୍ତି ହୁଅଇ ମଧୁ ମିଶ୍ରିତ

ଦୁଃଖ ଭରା କଥା ବାଜିଲେ କାନରେ

ସମବେଦନାର ବାଣୀ ନିଃସୃତ

ବୁଝିପାରେ ବୋଲି ବନ୍ଧୁ ମହତ୍ତ୍ବ

ମଣିଷପଣିଆ ଅଛି ତା'ର ପାଶେ

ହୁଏ ବାରବାର ପ୍ରତିଧ୍ବନିତ ।

ଯେବେ ବୈରଭାବ ଲୁଚି ରହିଥାଏ

କେମିତି ଅଛଟି ଛଳନାସିକ୍ତ

ବୁଲେଇ ବଙ୍କେଇ ସୂଚାଇ ଦିଅଇ

ଭୋଗାଭୋଗ ନିଜ କର୍ମ ଅର୍ଜିତ

ବଚନ ଉଗାଳି ସାରେ ମହତ

ଷଡ଼ ରିପୁ ସହ ବନ୍ଧୁତା କରି କେ

ଉତ୍ତମ ମଣିଷରେ କି ଗଣିତ ?

କେମିତି ଅଛନ୍ତି ମୋର ପିତାମାତା

ଭଲ ଅଛନ୍ତି ନା ସାଙ୍ଗସାଥୀଏଁ

କେମିତି ଅଛନ୍ତି ପ୍ରାଣ ସଖୀ ରାଈ

ଭଲ କି ଅଛନ୍ତି ସେଠି ଗୋପୀଏଁ

ଉଦ୍ଧବେ ପଠାଇ ଗୋପ ନଗରୀ

ପୁଚ୍ଛାଥିଲେ ପରା ଭଗବାନ କୃଷ୍ଣ  

ଦ୍ବାପରରେ ନର ଶରୀର ଧରି ।