କବିର ଠିକଣା
କବିର ଠିକଣା
କାଲି ରାତି ପାହିଲା ବେଳକୁ
ଯଦି ମୁଁ ହଜିଯାଇଥିବି
ଏଇ କଳା ଘୁମର ଅନ୍ଧାର ଭିତରେ
ଯେଉଁଠି ଛାଇ ବି ଦଗା ଦିଏ, ତମେ ଖୋଜିବ !
ତମେ ଖୋଜିବ ତ କୁହ
ମୁଁ ଡରିବିନି ଅନ୍ଧାରକୁ
ଅନ୍ଧାରରେ ଡରଉଥିବା
ଅଶରୀରି ଆଖି ମାନଙ୍କୁ ।
ଅନ୍ଧାରର ଆଁ କେତେ ବଡ଼ କି !
ଆଲୁଅ ଖୋଜିବା ନିଶାରେ
ପହଁରି ସାରିଲିଣି ସମୁଦ୍ର ପରି ଅନ୍ଧାର
ତମେ ଚିମୁଟେ ଜହ୍ନରାତି
ଧାର୍ କରି ଆଣିପାରିବ ତ କୁହ
ମୁଁ ଗାଧେଇ ପଡିବି ସେତକରେ ।
ଶୁଣ, ଯଦି ତମେ ଖୋଜିବ
ଅଥଚ ପାଇବନି ମୋ ପାଦଚିହ୍ନ,
(ହୁଏତ ସୋରିଷ ମୁଠେ ବିଞ୍ଚିପାରିନଥିବି ରାସ୍ତାରେ)
ଉତ୍ତରରେ ଧ୍ରୁବ ତାରା ମୋର ସାକ୍ଷୀ
ତାକୁ ଇ ପଚାରିବ ।
ତମେ ଚାଲିପାରିବ ତ
ଏତେ ରାସ୍ତା ମୋ ପଛରେ !
ସତର୍କ ଥିବ, ଚତୁର ବ୍ୟାଧ
ଖୁଦ ବୁଣିଥିବ କେଉଁଠି ।
ମୁଁ ତମ ଅପେକ୍ଷାରେ
ନଥିବି କେବେ ବି
ମିଶିଯାଇଥିବି ଅନ୍ଧାର ସହ
ଅନ୍ଧାର ହେଇ
ତମେ ଚିରିପାରିବ ତ
ସେ ଅଭିଶପ୍ତ ଇନ୍ଦ୍ରଜାଲ !
ଯେଉଁଠି ନିରୁତା ଆଲୁଅ ବି
ଡାହାଣୀ ଆଲୁଅର ଭୟ ଦେଖାଏ ।
ଯଦି ଢେର୍ ଖୋଜିଲା ପରେ ବି
ମୋତେ ନ ପାଅ ଅବା ଥକିଯାଅ
ଓଲଟେଇବ ମୋ କବିତାର ପୃଷ୍ଠା ।
ସେଥିରେ ଲେଖାଥିବ ଠିକଣାଟିଏ
ସେଇ ଠିକଣାରେ ମୁଁ ଥିବି
ନିଶ୍ଚୟ ଥିବି ।
ପାରିବ ତ !