ଝିଅ ପାଇଁ ବାପାର ସନେଟ୍

କଥା କୁହା କଣ୍ଢେଇ ଲୋ ତୁ ବାପାର ପରୀ,

ତୁ ମୋର ସବୁ ଠାରୁ ସୁନ୍ଦର କବିତା,

ମୁଁ ତୋର ବାପା ସିନା ତୁ ମୋ ମାଆ ପରି,

ଛଳଛଳ ନଈ ଟିଏ ତୁ ମୋର ଦୁହିତା।

ଭଲ ଲାଗେ ତୋର ଅଳି ତୋର ରାଗରୁଷା,

ଭଲ ଲାଗେ ମତେ ତୋର କଥାର କୁହୁକ,

ତୁ ଟିକି ପକ୍ଷୀ, ମୁଁ ବାଇ ଚଢେଇର ବସା,

କଢିଟେ ତୁ ଫୁଲ ଫୁଟି ବାଣ୍ଟିବୁ ମହକ।

ମତେ ଛାଡ଼ି,ଯିବୁ ଦିନେ ଶାଶୂଘର ତୋର,

ରହିଯିବ ମୋ ପାଖେ ତୋ ଖେଳନା ଯେତେ ସବୁ,

ପକ୍ଷୀରାଜ ଘୋଡ଼ା ଚଢ଼ି ଆସିବ ତୋ ବର,

ସେ ଦିନ ମୋ ଆଖିରେ ତୁ ଲୁହ ଭରିଦବୁ।

କରେ ଆଶୀର୍ବାଦ, ଲାଗି ଯାଉ ତତେ ମୋ ଆୟୁଷ,

ହସୁଥିବୁ ସଦା, କରୁଥିବୁ ବିଷକୁ ପୀୟୁଷ।