ଜାତିଭେଦ
ଜାତିଭେଦ
ବିଶାଳ ସଂସାରେ ଏ ମନୁଷ୍ୟ ଜାତି
ସର୍ବଶ୍ରେଷ୍ଠ ରୂପେ ଜଣା
ଜାତିଭେଦ ନୀତି ଗ୍ରାସିଛି ସମାଜେ
ହେଉଛନ୍ତି ବାଟବଣା ।
ବୈଦିକ ଯୁଗରେ କର୍ମ ଅନୁସାରେ
ଚାରିଜାତି ହେଲେ ଉଭା
ବ୍ରାହ୍ମଣ,କ୍ଷତ୍ରିୟ,ବୈଶ୍ୟ ଲୋକଙ୍କର
ଶୁଦ୍ର କରୁଥିଲେ ସେବା ।
ସେବା ଯିଏ କରେ ଅଛୁଆଁ କି ହୁଏ
ଲାଗେ ଭାରି ଆଚମ୍ବିତ
ବିଚିତ୍ର ଆମର ଚିନ୍ତାଧାରା ସତେ
କେଉଁ ରୋଗେ କବଳିତ ?
ସକଳ ମନୁଷ୍ୟ ଈଶ୍ୱର ସନ୍ତାନ
ପଢୁଅଛ ପୁରାଣରେ
ତଥାପି କାହିଁକି ଜାତିର ପ୍ରାଚୀର
ଗଢିଅଛ ସମାଜରେ ?
ସଭିଙ୍କ ଶରୀରେ ସମାନ ରକତ
ବୋହୁଅଛି ପ୍ରମାଣିତ
କୁପ୍ରଥା ଜାବୁଡି ଆତ୍ମବଡିମାକୁ
କରୁଅଛ ପ୍ରଦର୍ଶିତ ।
ପ୍ରକୃତ ଶିକ୍ଷା ଯେ ପାଇଛି ଜୀବନେ
କରେନାହିଁ ଜାତିଭେଦ
ମିଳିମିଶି ଚାଲ ଘୃଣିତ ପ୍ରଥାକୁ
କରିଦେବା ଆମେ ବନ୍ଦ୍ ।
ଜାତିଭେଦ ପରି ମିଥ୍ୟା ଅହମିକା
ପ୍ରଗତିର ଅନ୍ତରାୟ
କୁପ୍ରଥା ବିଲୋପେ ନୂତନ ଯୁଗର
ନିଶ୍ଚେ ହେବ ଅଭ୍ୟୁଦୟ ।