ହସି ପାରୁନିକିପାରୁନି ରୁଷି

 

  ବାପାବୋଉ ସଦା କାମରେ ଭୋଳ

  ମୋ ପାଇଁ ତାଙ୍କର ନଥାଏ ବେଳ

  ଏତେ ବଡ ଘର ଏକଲା ରହେ

  ମାଟିକୁ ଚାହେଁ ମୁଁ ଆକାଶେ ଚାହେଁ

  ଆମ ସହର ଠୁ ବହୁତ ଦୂର

  ଗାଁ ଆମର ସେ ଭାରି ସୁନ୍ଦର 

  ଗାଁ ଘରକୁ ତ ଜଗି ରହିଛନ୍ତି

   ଜେଜବାପା ଆଉ ଜେଜିମା ମୋର

  ବେଳେବେଳେ ସିଏ ବୁଲି ଆସନ୍ତି

   ମୋ ସାଥିରେ ଭାରି ମଜା କରନ୍ତି

  ଜେଜ ତ ହସାନ୍ତି ଗପ ଶୁଣାନ୍ତି

  ଜେଜିମା ମୋତେ ଗେଲ କରନ୍ତି

   ଜେଜ ଜେଜିମାଙ୍କ ଫେରିବା ବେଳେ

   ମୁହଁ ଲୁଚେଇ ମୁଁ ତାଙ୍କରି କୋଳେ

   କାନ୍ଦେ ରାହାଧରି ଚିହିରି ଚିହିରି

  ସାଥିରେ ଯିବାକୁ କହେ ବିକଳେ

  ମନହୁଏ ତାଙ୍କ ସାଥିରେ ଯାଇ

  ପଢନ୍ତି ତାଙ୍କରି ପାଖରେ ରହି

  ଖେଳନ୍ତି ବୁଲନ୍ତି ହସନ୍ତି ରୁଷନ୍ତି

  ମନ ଉଡୁଥାନ୍ତା ଆକାଶେ ଯାଇ

  ବାପା ତ ଦିଅନ୍ତି ମୋତେ ବୁଝାଇ

 ଗାଁରେ ତ ଭଲ ସ୍କୁଲ ନାହିଁ

 ପଢିବୁ କେଉଁଠି କହ ତୁ ବାବୁରେ

  ନପଢିଲେ ଯିବୁ ମୂରୁଖ ହୋଇ

ଏଇ କଥା ଶୁଣି ହସ ଲାଗେରେ

  ବାପା ବଡ ହେଲେ ସେହି ଗାଁରେ

  ମୋତେ କରିଦେବ ମୂରୁଖ କେମିତି

  ସେଇ ଗାଁ ସେଇ ମାଟି ପାଣିରେ ?

  ଜେଜ ଜେଜିମା ମୋ ଯାଆନ୍ତି ଫେରି

  ରହେ ମୁଁ ଏକଲା ମନକୁ ମାରି

   ବାପାବୋଉଙ୍କର ଫେରିବା ଯାଏତ

   ଏକା ଏକା ଯାଏ ଦିନ ମୋ ସରି

  ଏତେବଡ଼ ଘରେ ଏକଲା ବସି

  ହସି ପାରୁନିକି ପାରୁନି ରୁଷି

  ସାଙ୍ଗ ନାହାଁନ୍ତି କି ସାଥିବି ନାହାନ୍ତି

  କା ସାଥେ ଖେଳିବି ହେବି ମୁଁ ଖୁସି ?