ଲାଇବ୍ରେରୀ
ପ୍ରୋଫାଇଲ୍
ହସ
ହସ
1 min
258
ଚୁନି ଚୁନି ହସର ଗାଲିଚା
କଅଁଳ ମଖମଲି ଗାଲେ
ଲେସି ଦିଏ
ଇମ୍ପୋଟେର୍ଡ ବ୍ରାଣ୍ଡର
ଲୋସନ ଆଉ
ଚମକାଏ ଦେହଟାକୁ
ସତେଜ ଫୁଟିଲା
ଅସ୍ତରାଗ ଗୋଲାପରେ ll
ଲୁଚି ଲୁଚି ଯେବେ ଦେଖେ,
ଚର୍ମ ତଳେ ବସା ବାନ୍ଧିଥିବା
ମେଞ୍ଚା ମେଞ୍ଚା
ପୂତ୍ତିଯୁକ୍ତ ମାଂସର ସହରକୁ
ଆଇଁସିଣିଆ ଗନ୍ଧଟା
ନିମିଷେ ନାକଟା
ବନ୍ଦ କରିବାକୁ
ବାଧ୍ୟକରେ ll
ବିବସ୍ତ୍ର ଶରୀର
ତନ୍ନ ତନ୍ନକରି
ପରଖିବାର ନିଶା
ଘେରିଥିବା ବିଲୁଆ କୁକୁରଙ୍କ
ଅନ୍ତହୀନ ପ୍ରତିଯୋଗିତା,
ତୃଷିତ ମନେ ସ୍ପର୍ଶର ଲାଳସା
କ୍ଷୁଧାର୍ତ୍ତ ଜିହ୍ଵା ହଜିଯାଏ
କାମନାର ଅଶାନ୍ତ ତୃପ୍ତିରେ ll
ସଫେଦ ବିଛଣା
ଲମ୍ବିଥିବା ମନ୍ଥିତ ରକ୍ତନଳୀ
କରିଦିଏ ଖିନ୍ ଭିନ୍
କେଇଖଣ୍ଡ କଞ୍ଚା ମାଂସ,
ଡାକ୍ତର ସେବିକାଙ୍କ
ବେପରୁଆ ଅସ୍ତ୍ରୋପଚାର
ଧାରୁଆ ଛୁରୀରେ ll
ତଥାପି
ମନଟା କାହିଁ ବୁଡି ରହେ
ଆତ୍ମଗାରିମାର ମହୋଦଧି
ଅବା ସ୍ବାଭିମାନୀ
ମଣିଷ ପଣିଆ,
ଉର୍ଦ୍ଧକୁ ଉଠିଥିବା
ଶବ୍ଦଭେଦି ହାବେଳିର
ଝକ୍ ମକି ଆଲୋକ ମାଳାରେ ll
