ଗଡୁ ବଡ଼ଦାଣ୍ଡେ ରଥ
ଗଡୁ ବଡ଼ଦାଣ୍ଡେ ରଥ
ମୁଁକାର ଦଉଡି ନାଗ ଶଙ୍ଖଚୂଡ଼
ଭିଡିଧରି ଦୁଇ ହାତେ
ଟାଣୁଛି ଭକ୍ତିରେ ଦିଅ ଦରଶନ
ବିରାଜ ହୃଦୟ ରଥେ ।
ଚଳୁ ସ୍ୱଚ୍ଛନ୍ଦରେ ସତ୍ୟ ପ୍ରଜ୍ଞା ଜ୍ଞାନ
ଜାଗୃତି ପ୍ରେମ ଆସକ୍ତି
ଅଣିମା ବିଭୂତି ତୂରୀୟ ନିର୍ବାଣ
ନନ୍ଦିଘୋଷ ଧୀ ସୁସ୍ୱସ୍ତି ।
ହୃଦ ସହସ୍ରାରେ ବିକଶୁ କମଳ
ପ୍ରଫୁଲ୍ଲିତ ଶତଦଳ
ମହକୁ ସୁବାସ ଚନ୍ଦନ ତୁଳସୀ
କଣ୍ଠେ ଦୟଣାର ମାଳ ।
ଗଡୁ ବଡ଼ଦାଣ୍ଡେ ଶରଧାବାଲିରେ
ରଥ ସତ୍ୟ ଧର୍ମ ପଥେ
ପତିତପାବନ ଜଗନ୍ନାଥ ସ୍ୱାମୀ
ବିରାଜ ମୋ ମନୋରଥେ ।
କୋଟି ସୂର୍ଯ୍ୟପ୍ରଭ ବିବେକ ସୂରୁଜ
ବାମନ ପୁରୁଷୋତ୍ତମ
ତୁମ ପଦ୍ମପାଦେ ପରମ ଆନନ୍ଦ
ସିଦ୍ଧି ମୁକ୍ତି ପୂର୍ଣ୍ଣକାମ ।
----