ପ୍ରାତଃ ସ୍ମରଣୀୟ ଅଂଶୁମାନ
ପ୍ରାତଃ ସ୍ମରଣୀୟ ଅଂଶୁମାନ
ଶୁଭ ସକାଳ ରେ ବ୍ରାହ୍ମେ ମୁହୂର୍ତ୍ତ ରେ
ନଭେ ଆସ ଦିବାକର
ମହି ମଣ୍ଡଳ କୁ ପରସି ଦିଅ ହେ
ସୁନେଲି ଆଶିଷ କର l
ତୁମ୍ଭେ ଆସିବାରେ ମନ ଆନନ୍ଦ ରେ
ନୀଡ଼ ତେଜି ଖଗ ଗଣ
କୁକ୍କୁଟ ବାୟସ ପିକ ରାଜହଂସ
କରନ୍ତି ମନ୍ତ୍ର ଗାୟନ l
ପୁଷ୍କରିଣୀ ଜଳେ କମଳିନୀ ଖେଳେ
ମୁକ୍ତା ହାର କରେ ଧରି
କରନ୍ତି ସ୍ବାଗତ ଆସ ଦିନ ନାଥ
ପାହିଲା ଏବେ ଶର୍ବରୀ l
କୁଆଁରୀ ବୋହୂ ଟି ପ୍ରଭାତ ରେ ଉଠି
ସଅଳ ସ୍ନାହାନ ସାରି
କର୍ମ କ୍ଷେତ୍ରେ ସେହୁ ତତପର ହୁଏ
ଇଷ୍ଟ ଙ୍କୁ ପ୍ରଣାମ କରି l
ତବ ଆଗମନେ ଏ ମର୍ତ୍ତ୍ୟ ଭୁବନେ
ସୁପ୍ତ ହୁଅଇ ଜାଗ୍ରତ
ମଠ ମନ୍ଦିର ରେ ଘଣ୍ଟି ନାଦ କରେ
ଶ୍ରଦ୍ଧାଳୁ ସାଧୁ ଭକତ l
ରୋଗୀ ଭୋଗି ଯୋଗୀ ରବି ତବ ଲାଗି
ସଅଳ ସଜ୍ଜ୍ୟା ଛାଡନ୍ତି
ମଧୁର ପୀୟୁଷ ଲଭିବା ପ୍ରୟାସେ
ଭାବି କାର୍ଯ୍ୟ ଆରମ୍ଭନ୍ତି l
ତବ ଆଗମନେ କୃଷି କ୍ଷେତ୍ରେ ଗମେ
ନିରୀହ କୃଷକ ଭାଇ
ଲୁହ ଲହୁ ଦେଇ କରମ କରଇ
ଏ ସାରା ଜଗତ ପାଇଁ l
ତବ ଆଗମନେ ସୁନୀଳ ଗଗନେ
ପାହାନ୍ତିଆ କୁଆଁ ତାରା
ଲୁଚି ଯାଏ ଘରେ ଆନନ୍ଦ ମନରେ
ଦିବସେ ନ ଦିଏ ଧରା l
ଦେଖି ପ୍ରାଚୀ ଭାଗ ବଢଇ ଆବେଗ
ନାବିକ ମନ ର ଆଶା
ଦିନ ନାଥ ଙ୍କର ପହିଲି ସ୍ପର୍ଶରେ
ଆରମ୍ଭେ କୁଳ ବେଉସା l
ମାଆ କୋଳ ଛାଡ଼ି ଦିଏ ହମ୍ବା ରଡ଼ି
ଗୋବତ୍ସା କୋମଳ ମତି
ଦିଅଇ ସଂକେତ ହେ ପ୍ରଭୁ ଆଦିତ୍ୟ
ଗଗନେ ତେଜିଲ ବତି ।
ପଲ୍ଲୀ ବ୍ୟବସାୟୀ ପ୍ରଭୁ ନାମ ଗାଇ
ଆରମ୍ଭନ୍ତି ନିଜ କର୍ମ
ଧରଣୀ ବକ୍ଷ ସଜୀବ ଦିନ ରେ
ନ ଭୁଲନ୍ତି ନିଜ ଧର୍ମ l
ଆହେ ପ୍ରଭାକର ତପନ ଭାସ୍କର
ଦିବ୍ୟ ଚେତନା ର ମର୍ମ
ତୁମ୍ଭେ ବ୍ରହ୍ମାଣ୍ଡ ର ସକଳ ପିଣ୍ଡ ର
ନିରାମୟ ଶକ୍ତି ବ୍ରହ୍ମ l
ଆହେ ଛାୟ କାନ୍ତ ଅରୁଣ ଆଦିତ୍ୟ
ଦିବ୍ୟ ଜ୍ୟୋତି ପ୍ରକାଶନ
ପ୍ରଭୁ ଅଂଶୁମାଳି ବ୍ୟାଧି ଦିଅ ଯାଳି
ଭାନୂ ଦେବ ଅଂଶୁମାନ l
ସବିତା ଅରୁଣ ଅର୍କ ନାରାୟଣ
ପ୍ରଭୂ ମିତ୍ର ପଦ୍ମ କାନ୍ତ
ତୁମ୍ଭ ଲାଗି ବୃଷ୍ଟି ତୁମ୍ଭ ଲାଗି ସୃଷ୍ଟି
ହସୁଛି ସାରା ଜଗତ l
ଅଜୟ କହଇ ସର୍ବ ଶକ୍ତି ତୁମେ
ହେ ବିରଞ୍ଚି ନାରାୟଣ
ବିଶ୍ୱ ବ୍ରହ୍ମାଣ୍ଡ ର ସକଳ ଜୀବ ର
ଦୁଃଖ କରନ୍ତୁ ହରଣ l