ଗଛଟେ ଦିଅ ଲଗାଇ

ମଞ୍ଜିଟିଏ ନେଇ ଭୂଇଁରେ ପୋତିଲେ

ହେବ ସିଏ ଦିନେ ବୃକ୍ଷ

ତା'ର ଯତ୍ନ ନେଇ ପାଳିଲେ ଆମେ

ଫେଡିବ ସେ ଆମ ଦୁଃଖ ।

ସନ୍ତାନଟେ ପରି ପାଳିଲେ ତାହାକୁ

କେତେ ଫୁଲ ଫଳ ଦେବ

ଶୀତଳ ପବନ ଦେବ ସେ ଆମକୁ

ଅମ୍ଳଜାନ ଯୋଗାଇବ ।

ଘର ଆଗ ପଛ ଲଗାଇଲେ ଗଛ

ଘରକୁ ହୋଇବ ଛାଇ

ଖରାଦିନ ତାତି ବାଧିବନି ଜମା

କଷ୍ଟ ମୋଟେ ହେବନାହିଁ ।

ପୁଅଟିଏ ହେଲେ ପାଳୁଛ ପୋଷୁଛ

କେତେ ଦୁଧ ଭାତ ଖୋଇ

ହେଲେ ବୃଦ୍ଧକାଳେ ସେଇ ପୁଅ ଦିନେ

ବୃଦ୍ଧାଶ୍ରମେ ଛାଡେ ନେଇ ।

ଗଛଟିଏ ପୋତି ତାର ଯତ୍ନ ନେଲେ

ଜୀବନ ସାରା ସେ ପୋଷିବ

ଛାଇତଳେ ତାର ଆଶ୍ରୟ ନେବ

ଫଳ ଆନନ୍ଦରେ ଖାଇବ ।

ଗଛ ଫୁଲ ଫଳ ଡାଳ ସବୁକିଛି

ଆମ ବ୍ୟବହାରେ ଲାଗୁଛି

ଜୀବନର ସଞ୍ଜ ନଇଁ ଗଲା ପରେ

ତା'କାଠରେ ଜୁଇ ଜଳୁଛି ।

ସେଥିପାଇଁ ବନ୍ଧୁ ମଞ୍ଜିଟିଏ ପୋତି

ଗଛଟେ ଦିଅ ଲଗାଇ

ସବୁ ଦୁଃଖ ତୁମେ ଭୁଲିଯିବ ଦିନେ

ଯେବେ ଦେବ ସେ ତୁମକୁ ଶୀତଳ ଛାଇ।

ମମତା ମଞ୍ଜରୀ ଦାସ,ବାଲିସାହି,ମଧୁପାଟଣା,କଟକ

ଦୂରଭାଷ ..୯୭୭୭୪୭୩୨୭୭